Да 20 лютага працягнецца прыём заявак на ўдзел у абласным фестывалі маладых мадэльераў і дызайнераў адзення
Хоць да наступлення каляндарнай вясны засталося менш за два тыдні, для брэсцкіх моднікаў яна пачнецца толькі 15 сакавіка, калі будзе дадзены старт вясне моднай, яркай і апранутай з іголачкі. 15-ты па ліку абласны фестываль маладых мадэльераў і дызайнераў адзення “Стыль-2013”
пройдзе ў абласным грамадска-культурным цэнтры. Падаць заяўку на ўдзел у фэсце можна да 20 лютага. Для гэтага неабходна звярнуцца ў абласны камітэт ГА “БРСМ” па адрасе: г. Брэст, вул. Наганава,10, каб. 317, кантактны тэлефон: 8(0162)23-30-77. Падрабязную інфармацыю і ўзор заяўкі можна знайсці ў сацыяльнай сетцы “ВКонтакте”.
Як і ў папярэднія гады, удзельнікі “Стылю” маюць шанс трапіць на самы вядомы і прэстыжны фэшн-фестываль у нашай краіне – “Млын моды”. Калекцыі, якія вызначыць прафесіянальнае журы, будуць паказаны ў маі на сталічных подыумах.
Традыцыйна за “пуцёўку” на “Млын моды” ўдзельнікі паспрачаюцца ў трох намінацыях: “Школа моды” (спаборніцтва для студэнтаў навучальных устаноў, якія займаюцца падрыхтоўкай спецыялістаў для швейнай галіны), “Майстры моды” (конкурс для дызайнераў і прадпрыемстваў), а таксама “Супермадэль” (журы будзе выбіраць лепшую мужчынскую і жаночую мадэлі ў фінальным паказе).
Як расказалі ў аргкамітэце, сярод тых, хто падаў ужо заяўку на ўдзел у фэсце, ёсць вопытныя заваёўнікі “Стылю”. Свае калекцыі збіраюцца прадэманстраваць навучэнцы Віцебскага дзяржаўнага тэхналагічнага ўніверсітэта, Баранавіцкага дзяржаўнага каледжа лёгкай прамысловасці імя В.Чарнышова, Брэсцкага дзяржаўнага каледжа сферы абслугоўвання і інш. Абавязкова будуць адкрыты новыя імёны. Не абыдзецца без свежых ідэй і крэатыўнага рашэння таго, якой будзе модная вясна 2013 года.
Вольга СВІРЫДОВІЧ, “НТ”.
Фота аўтара.
Вясна пачнецца са… “Стылю”
