Беларусь

  • Главная
  • На першым плане
  • 18 калекцый берасцейскіх мадэльераў атрымалі “пуцёўкі” на рэспубліканскі фестываль-конкурс “Млын моды”

18 калекцый берасцейскіх мадэльераў атрымалі “пуцёўкі” на рэспубліканскі фестываль-конкурс “Млын моды”


Нягледзячы на зімнія сюрпрызы цыклону “Хаўер”, які панаваў у нашай краіне ў мінулую пятніцу, у абласным цэнтры далі старт моднай вясне – прайшоў 15-ты па ліку конкурс маладых мадэльераў і дызайнераў адзення “Стыль-2013”.
Мужчынскія, жаночыя, падлеткавыя і, безумоўна, дзіцячыя калекцыі выклікалі не толькі гучныя апладысменты, але і непадробны інтарэс мясцовых моднікаў. Многае з убачанага смела можна назваць
прэт-а-партэ і акурат са сцэны адправіць на продаж у нейкі буцік моднага адзення. Аднак лёс многіх калекцый абяцае быць больш цікавым. Аж 18 з іх будуць прэзентаваны ў сталіцы, на прэстыжным рэспубліканскім фестывалі-конкурсе “Млын моды”.
Пераможцамі і прызёрамі “Стылю-2013” сталі: Кацярына Занька (“Верасу хвалі”) і Таццяна Кандрацюк (“У іх адлюстраваліся нябёсы…”), Вольга Сайко (“Інтэграл гармоніі”) – яны з’яўляюцца навучэнкамі Баранавіцкага дзяржаўнага прафесійна-тэхнічнага каледжа сферы абслугоўвання; Вольга Масько (“Roman”) з Брэсцкага дзяржаўнага прафесійна-тэхнічнага каледжа сферы абслугоўвання; Вікторыя Мацюх (“Дарога з Рамашкава”) з Баранавіцкага дзяржаўнага каледжа лёгкай прамысловасці імя Чарнышова.
Сярод “Майстроў моды” першае і другое месцы вызначаны не былі. На трэцім – Аксана Супрунюк (“Пачуцці”) з цэнтра дадатковай адукацыі дзяцей і моладзі г. Брэста, тэатральнай студыі “Эцюд”.
Па словах членаў журы фестывалю-конкурсу “Млын моды” Ігара Іванова і Святланы Гнядзёнак, многія калекцыі патрабуюць значнай дапрацоўкі. Нагадаем, што раней для ўдзельнікаў “Стылю-2013” праводзіўся ўстановачны семінар, на якім многія атрымалі каштоўныя парады. На жаль, не ўсе да іх прыслухаліся, а таму модны прыгавор быў жорсткім.
Нягледзячы ні на што, свята моды атрымалася і, спадзяёмся, сапраўды дало старт вясне – толькі ўжо не моднай, а каляндарнай.
Вольга СВІРЫДОВІЧ, “НТ”.
Фота аўтара.

18 калекцый берасцейскіх мадэльераў атрымалі “пуцёўкі” на рэспубліканскі фестываль-конкурс “Млын моды”
Оцените статью

Добавить комментарий

Авторизация
*
*
Генерация пароля