Заўтра – рэспубліканскі суботнік. Пастараемся?

Заробленыя на рэспубліканскім суботніку грошы будуць накіраваны на падрыхтоўку дзіцячых аздараўленчых лагераў да летняга сезона, рэалізацыю мерапрыемстваў Года беражлівасці і набыццё аўтамабіляў “Хуткай дапамогі”

У красавіку па даўняй традыцыі ў Беларусі – месячнік па добраўпарадкаванні. У гэты ж час праходзіць, як у народзе кажуць, “чыстая субота” – рэспубліканскі суботнік, які сёлета ладзіцца 20 красавіка.
Як і ў папярэднія гады, працаваць прапанавана на добраўпарадкаванні населеных пунктаў, месцаў баявой і воінскай славы, пахаванняў воінаў і партызан Вялікай Айчыннай вайны. Плануецца, што палова заробленых грошай пойдзе на падрыхтоўку дзіцячых аздараўленчых лагераў да летняга сезона, а таксама на рэалізацыю мерапрыемстваў у рамках Года беражлівасці. Другая палова будзе накіравана на набыццё аўтамабіляў “Хуткай дапамогі”.
Як паведамляе прэс-служба Урада, кіраўніком рабочай групы па правядзенні рэспубліканскага суботніка назначаны намеснік Прэм’ер-міністра Рэспублікі Беларусь Пётр Пракаповіч. Яго адказнымі памочнікамі з’яўляюцца міністр аховы здароўя Васіль Жарко і міністр эканомікі Мікалай Снапкоў. На месцах да суботніка добраахвотна могуць падключыцца ўсе: ад старшыні абласнога выканаўчага камітэта да школьніка. І штосьці падказвае, што так яно і будзе, бо раней суботнік заўжды быў масавай акцыяй.
Нягледзячы на тое, што рэспубліканскі суботнік пройдзе толькі заўтра, многія берасцейцы актыўна ўключыліся ў акцыю загадзя. Для таго, каб на свае вочы паглядзець на ранні старт суботніка, журналіст “НТ” выйшла на цэнтральныя вуліцы Брэста.
Гаспадары гандлёвых павільёнаў у “Маскоўскіх радах” каля ЦУМа разам з прадаўцамі пачалі генеральную ўборку яшчэ ў выхадныя. У нядзелю, а потым і ў панядзелак яны мылі вокны і дзверы, прыбіралі тэрыторыю побач з рынкам ды наводзілі марафет на сваіх рабочых месцах.
– Навошта чакаць афіцыйнага суботніка? – разважае прадпрымальніца Таццяна Кірылюк. – Чысціню неабходна падтрымліваць, а не наводзіць. У гэтыя выхадныя ў рэшце рэшт пацяплела, таму, думаю, многія гаспадыні актыўна ўзяліся за швабры ды венікі, а афіцыйнага старту чакаць не трэба. А што тычыцца 20 красавіка, дык вый-дзем і ў гэты дзень, бо ў правядзенні суботніка бачу толькі станоўчае. Мой муж, напрыклад, працуе на “Газаапараце”, яны штогод адлічваюць пэўную суму, яшчэ працуюць на аб’ектах добраўпарадкавання ў горадзе. А працаваць жадаюць усе.
“Белтэлекам”, пошта, абласны ліцэй, некаторыя магазіны на вуліцы Савецкай, банкі і кіёскі “Белсаюздрук”  – тут “чыстую” вясну сустракаюць поўным ходам. Смела можна сказаць, што суботнік у абласным цэнтры пачаўся загадзя. Ды і ў райцэнтрах сітуацыя такая ж, бо ўсе добра разумеюць, што працуюць для сябе, для сваіх дзяцей, для сваёй краіны.
Месцаў, дзе можна і трэба папрацаваць на суботніку, шмат. У абласным цэнтры адным з асноўных з’яўляецца мемарыяльны комплекс “Брэсцкая крэпасць-герой” – дарэчы, тут разгорнецца маштабная акцыя абласной арганізацыі ГА “Беларускі рэспубліканскі саюз моладзі”. Акрамя таго, у суботнім лісце чакання – парк культуры і адпачынку імя 1 Мая, парк воінаў-інтэрнацыяналістаў, шэраг спартыўных аб’ектаў.
У райцэнтрах Брэстчыны аб’ектаў добраўпарадкавання таксама хапае. У бярозаўскім штабе суботніка паведамілі, што працаваць плануюць на Цэнтральным стадыёне, стадыёне ў Паўночным гарадку, кляштары картузіянцаў. У Кобрыне суботняя “ўборка” разгорнецца ў гарадскім парку імя А.В. Суворава, і не толькі. Свяцілаўскае возера, гарадскі парк, стадыён, студэнцкі гарадок – вось толькі частка аб’ектаў у Баранавічах, якія будуць задзейнічаны ў акцыі…
Здаецца, неістотна, дзе працаваць у гэты дзень: галоўнае – усе разам будзем рабіць добрую справу. Цудоўна, што берасцейцы адгукнуліся і нават за тыдзень пачалі наводзіць парадак на  зямлі. Будзем лічыць, што гэта была размінка перад заўтрашнім суботнім, але працоўным днём.
Вольга СВІРЫДОВІЧ, “НТ”.