ПРЫВІТАННЕ, СЯБРЫ!
Журналісцкая работа даволі часта прымушае карэспандэнта мабілізавацца і аператыўна рэагаваць на падзеі, хутка збіраць факталагічны матэрыял, абдумваць і пісаць. Вось мы і падумалі: а чаму б не праверыць гэтую прафесійную якасць у юных карэспандэнтаў?! Напрыканцы навучальнага года замест традыцыйнага дамашняга творчага задання прапануем прыняць удзел у юнкараўскім бліц-конкурсе “ЦЭНТР УВАГІ – ДЗЕЦІ”. Ён пачынаецца ў дзень выхаду гэтага нумара “НТ” і будзе доўжыцца роўна месяц. Так што апошні тэрмін адпраўкі работ – 26 мая. Іх можна даслаць па электроннай пошце або звычайнай (адрасы – на 12-й стар.).
Бліц-конкурс праходзіць у дзвюх намінацыях: “У КАДРЫ – ДЗЯЦІНСТВА” (дасылайце фотазамалёўкі, фотаэцюды, фотарэпартажы) і “У ДЗЯЦІНСТВЕ КОЖНЫ НОВЫ ДЗЕНЬ – ЗНАХОДКА” (чакаем заметак, замалёвак, інтэрв’ю пра вучобу, творчасць, грамадскую дзейнасць, спартыўныя дасягненні – усё тое, чым жывуць і займаюцца сучасныя дзеці).
Удзельнічаць можна ў кожнай намінацыі ці ў якой-небудзь адной. АБАВЯЗКОВЫЯ ЎМОВЫ – да фотаработ павінны быць подпісы; тэксты – на беларускай мове; звесткі пра аўтара – імя, імя па бацьку, прозвішча, школа, клас, хатні адрас, кантактныя тэлефоны. Конкурс праводзіцца для вучняў 8-11 класаў.
Вынікі будуць падведзены ў чэрвені, а пераможцы атрымаюць узнагароды рэдакцыі. За справу, юныя карэспандэнты!
от8 февраля, 2019