Ешце імбір ці… завядзіце сабаку

Усім вядома, што ад стану імуннай сістэмы залежыць ступень абароненасці ўсяго арганізма. Калі наш імунітэт працуе без збояў, дык ніякія вірусы і бактэрыі, таксіны і паразіты яму не пагражаюць. І нават у сезон халадоў чалавек адчувае сябе бадзёрым. Але ж імунітэту, які працуе днём і ноччу, неабходна дапамагаць, калі мы хочам, каб абарона была эфектыўнай. У чытачоў і сяброў “НТ” мы спыталі: “Чым Вы падтрымліваеце сваю імунную сістэму?”
Святлана СМІРНОВА, метадыст аддзела адукацыі адміністрацыі Маскоўскага раёна г. Брэста:
– Імунная сістэма, безумоўна, вялікая працаўніца, таму ставіцца да яе трэба з асаблівай увагай. Раз у дзень падтрымліваю яе імбірам. Кавалачак імбірнага кораня трэба надзерці на дробнай тарцы, а потым дадаць масу (на кончыку лыжкі) у кубак чаю. І вечарам – пешыя прагулкі хвілін на 40-50 у зручным абутку. Калі вам складана прымусіць сябе абавязкова хадзіць кожны дзень, дык завядзіце сабаку – адмовіцца ад пешага мацыёну будзе немагчыма!
Мікалай РАДЗЮК, намеснік дырэктара Брэсцкага аўтавакзала:
– Ведаю, што для імуннай сістэмы карысна штодня есці гародніну, а ў асенне-зімовы сезон арганізму дапамагае вітамін С. Квашаная капуста – выдатны варыянт! У нашай сям’і яе гатуюць так: на 5 літраў вады (папярэдне закіпяціць і астудзіць) бяром 100 грамаў солі. Выліваем салёны раствор у эмаліраваны посуд, у які будзем складваць пашынкаваную капусту. Да яе дадаём моркву, насенне кропу, жменьку журавін. Вада павінна пакрываць капусту недзе на сантыметр. Перамешваем, ставім на 3-4 дні ў цёплае месца, пасля чаго раскладваем у слоікі. Капуста і ў такім выглядзе смачная, а калі дадаць цыбулькі ды алею – пальчыкі абліжаш!
Валянціна МАШЭНСКАЯ, урач-валеолаг абласнога Цэнтра гігіены, эпідэміялогіі і грамадскага здароўя:
– Імунная сістэма ў нашым арганізме адказвае за ўсё. Калі вы сапраўды хочаце дапамагчы імунітэту, паклапаціцеся найперш пра бездакорную работу кішэчніка.
Настойліва рэкамендую, па-першае, кісламалочныя прадукты кожны дзень: кефір, ражанка, ёгурт без дабавак – 1-2 шклянкі. Па-другое, штодня абавязкова з’ядайце тры фрукты: грушы, яблыкі, бананы, апельсіны – любыя, якія вам падабаюцца. Па-трэцяе, заўсёды – дзве порцыі гародніны ў дзень: тушаная, сырая, запраўленая толькі рафінаваным(!) алеем. Па-чацвёртае, штодзённа прымайце рыбін  тлушч (1 чайная лыжка ці ў капсулах у адпаведнасці з узроставай нормай). І вядзіце максімальна здаровы лад жыцця!
Імунная сістэма ад такой увагі расквітнее, а разам з ёю і ваша самаадчуванне будзе выдатным, нягледзячы на сырое і халоднае надвор’е.
Парады выслухала
Святлана ТАБОЛІЧ, “НТ”.