Беларусь

Падведзены вынікі акцыі “Без гэтага можна жыць”


Падведзены вынікі  міжведамаснай акцыі “Без гэтага можна жыць”, якая з кастрычніка па снежань 2013 года праводзілася па ініцыятыве пракуратуры вобласці
Упэўнена, што ва ўсіх дзяцей, якія сабраліся 20 студзеня ў актавай зале абласнога грамадска-культурнага цэнтра, ёсць мара. І кожны з іх верыць, што яна абавязкова здзейсніцца. А вось у хлопчыкаў і дзяўчынак з відэароліка, які паказвалі на экране, мары не збыліся.  Яны патанулі ў віне, задыхнуліся ў іншых шкодных для здароўя  звычках. А без іх, між іншым, можна цалкам абысціся. Варта толькі захацець самому і засцерагчы ад  шкодных звычак сваіх блізкіх і сяброў.
Менавіта на прафілактыку правапарушэнняў і злачынстваў сярод дзяцей і падлеткаў, а таксама на фарміраванне ў іх здаровага ладу жыцця была скіравана акцыя “Без гэтага можна жыць”. У розных яе намінацыях прынялі ўдзел амаль 2000 хлопчыкаў і дзяўчынак. Падчас акцыі навучэнцы агульнаадукацыйных устаноў горада сустракаліся з работнікамі пракуратуры, абласных і гарадскіх структур адукацыі, галоўнага ўпраўлення ідэалагічнай работы, культуры і па справах моладзі, упраўлення спорту і турызму, упраўлення ўнутраных спраў аблвыканкама, упраўлення МНС, абласнога цэнтра гігіены, эпідэміялогіі і грамадскага здароўя, гарадскога камітэта БРСМ, удзельнічалі ў розных конкурсах і спартыўных турнірах.
Для самых актыўных удзельнікаў акцыі арганізатары падрыхтавалі ўзнагароды. Аб важнасці мерапрыемства сведчыла тое, што, акрамя работнікаў  абласной пракуратуры вобласці на чале з Іванам Насковічам, у падвядзенні вынікаў акцыі прынялі ўдзел кіраўнікі вышэйназваных абласных і гарадскіх структур, а яшчэ ўдзельніца Алімпійскіх гульняў у Пекіне і Лондане, бягуння Вольга Асташка.
Спецыяльныя граматы і каштоўныя падарункі атрымалі 111 хлопчыкаў і дзяўчынак,  яшчэ 30 школьнікаў – абанементы ў басейн. Іван Насковіч адзначыў самых эрудыраваных і актыўных у конкурсе на лепшае пытанне пракурору: вучня 6 “А” класа СШ №28 г. Брэста Сяргея Равуцкага, васьмікласніцу з СШ №25 Маргарыту Кандрацюк, вучняў 11 “Д” і 10 “Г” класаў абласнога ліцэя імя П.М. Машэрава Ігнація Навасада і Данііла Стралкоўскага. Галоўны дзяржаўны санітарны ўрач абласнога цэнтра гігіены, эпідэміялогіі і грамадскага здароўя Нэлі Гіндзюк узнагародзіла пераможцаў конкурсу “Скажы курэнню і наркотыкам не!”:
у намінацыі “Самая відовішчная акцыя” – СШ №30 імя Д.Б. Гвішыяні, у намінацыі “Самая масавая акцыя” –
СШ №18 г. Брэста.  Дыпломамі аддзела адукацыі, спорту і турызму Брэсцкага гарвыканкама і падарункамі адзначаны 15 удзельнікаў конкурсу сацыяльнай рэкламы “Маладзёжны погляд”. Вызначаны і ўзнагароджаны пераможцы конкурсу “Спорт асобага прызначэння”, які арганізавала УУС аблвыканкама, а таксама турніру па дартсе.
Ну, а сапраўдным святам для ўсіх стала  канцэртная праграма з удзелам  творчых дзіцячых калектываў, якая заклікала моладзь не адмаўляцца ад сваёй мары і дапамагаць у гэтым блізкім і сябрам.
Надзея ЯЦУРА, “НТ”.

Падведзены вынікі акцыі “Без гэтага можна жыць”
Оцените статью

Добавить комментарий

Авторизация
*
*
Генерация пароля