Мадэльнае агенцтва “Студыя “Тамара” правяло кастынг дзяўчат з мадэльнай знешнасцю
Столькі найпрыгажэйшых дзяўчат у адным месцы можа сабраць толькі конкурс! На гэты раз месцам канцэнтрацыі прыгажосці стаў Палац дзіцячай творчасці г. Баранавічы, у якім вядомае беларускае мадэльнае агенцтва “Студыя “Тамара” ладзіла кастынг, каб адшукаць новых топ-мадэлей.
“Студыя “Тамара” – адно з буйнейшых і паспяховых агенцтваў у мадэльным бізнесе Беларусі. Яно цесна супрацоўнічае з Беларускім цэнтрам моды, шэрагам прадпрыемстваў канцэрна “Беллегпрам”. Дырэктар студыі Тамара Ганчарова зазначыла:
– Мы шукаем дзяўчат з мадэльнай знешнасцю, каб даць ім шанс праявіць сябе на подыуме. Набіраем іх для нашай студыі, для ўдзелу ў міжнародных конкурсах. Наш кастынг – гэта не конкурс прыгажунь, а конкурс мадэлей.
Фінальнае шоу пройдзе ў ліпені ў Мінску. На яго запрошаны прадстаўнікі мадэльнага бізнесу з Італіі, Францыі, Японіі, славутага “Ford Models” з Нью-Ёрка. Але яшчэ будзе заключны кастынг у Мінску. На яго ў Баранавічах выбралі 14 дзяўчат. З імі правялі фотасесію. Можа, у гэты раз хто-небудзь з нашых зямлячак і стане новай беларускай топ-мадэллю з сусветнай папулярнасцю. Пачакаем фіналу.
Арцём ГАРБАЦЭВІЧ,
г. Баранавічы.
Адшукаем топ-мадэль?
