Данік КАЗЛОЎ: “ Я шчаслівы!”

Фіналіст дзіцячага конкурсу “Еўрабачанне-2010” любіць гульні на свежым паветры
20 лістапада ў 15-тысячным спарткомплексе “Мінск-Арэна” адбыўся фінал дзіцячага конкурсу песні “Еўрабачанне-2010”. Мільёны беларусаў хваляваліся за Даніка Казлова, а найбольш – у Жабінцы, адкуль ён родам. З песняй “Музыкі святло” юны спявак увайшоў у пяцёрку лепшых. Без перабольшання можна сказаць, што ў вобласці ён стаў юнай зоркай года ў намінацыі “Вакал”. Напярэдадні Новага года з ім сустрэўся карэспандэнт “НТ”.
– Ужо адышлі ў мінулае перажыванні і эмоцыі тых, хто хваляваўся, гледзячы фінал конкурсу. У цябе, відаць, таксама?
– Так, але засталіся незабыўныя ўражанні. Я шчаслівы таму, што пашанцавала выступіць на самай вялікай сцэне, пра якую марыў. Запомніліся праца і адпачынак у Мінску, хваляванні перад вялікай аўдыторыяй, сустрэча з аднакласнікамі пасля вяртання ў Жабінку.
– Конкурс – не толькі сцэнічнае спаборніцтва. Гэта яшчэ знаёмствы і творчыя прапановы…
– У мяне сапраўды з’явіўся сябар – Вова Арзуманян з Арменіі, які стаў пераможцам. Пасябраваў з ім у першы дзень нашай сустрэчы. Ён кампанейскі хлопец і мае цудоўны голас. Што наконт творчых прапаноў, дык ёсць першыя запрашэнні на выступленні ў Эстоніі і Літве. Але гэта будзе недзе ў канцы вясны ці летам 2011 года.
– Чым займаешся цяпер?
– Узяўся за вучобу, бо прапусціў шмат заняткаў у школе і дзіцячай школе мастацтваў. У вольны час у спартыўным комплексе “Бадзёрасць”, што ў пасёлку цукровага завода, гуляю ў футбол і плаваю.
– А як справы з песняй?
– Спяваю ў той жа дзіцячай эстраднай студыі “Алегра-Нова” раённага цэнтра пазашкольнай работы. Рыхтую новы рэпертуар для будучых выступленняў.
– Напрыканцы снежня прайшоў справаздачны канцэрт з удзелам народных і самадзейных мастацкіх калектываў раёна, у якім ты не браў удзел. Чаму?
– Ніхто не прапанаваў на ім выступіць. А напрошвацца самому ў нашай сям’і не прынята.
– Не крыўдуеш?
– Не. Хаця…
– А як ты, Данік, праводзіш зімовыя канікулы?
– Пабываў на прэзідэнцкай ёлцы. Як ужо казаў, шмат часу адводжу вучобе. Акрамя ўсяго – спорт і, вядома ж, гульні на свежым паветры з сябрамі.
– Зычу чыстага голасу і творчых поспехаў у новым годзе!
Гутарыў Аляксей ГАНЧУК, “НТ”,
г. Жабінка.
Фота аўтара.