Каб быць здаровым, трэба жыць у радасці

Праблемы  здароўя і даўгалецця заўсёды займалі розумы людзей. Многія навукоўцы хацелі стварыць цудадзейны сродак для захавання вечнай маладосці і бадзёрасці. Аднак яго пакуль не ўдалося распрацаваць нікому. Ды ўсё ж ёсць некаторыя сакрэты. Якія цуда-сродкі ведаюць нашы землякі, каб быць прыгожымі, здаровымі і бадзёрымі? Паслухаем удзельнікаў і наведвальнікаў IX Міжнароднай выставы-кірмашу “Садзейнічанне здароваму ладу жыцця – 2013”.
Сям’я Паповых,  пераможцы абласнога конкурсу “Здаровая сям’я”:
– Любіць жыццё, сябе і ўсіх навакольных –  гэта велізарны крок да здароўя. Але не трэба забываць і аб спорце, правільным харчаванні, а галоўнае – мець жаданне быць здаровымі.
Ян Шамаеў, вучань СШ № 9 г. Брэста:
– Бацькі з дзяцінства прывучылі мяне займацца спортам, фізкультурай (таму я ніколі не прапускаю яе ў школе). Быць упэўненым у сабе і нічога не баяцца, тады любую хваробу можна перамагчы. Не трэба забываць пра ўрачоў і наведваць іх часцей для прафілактыкі, а не толькі ў самых крытычных сітуацыях.
Аксана Трушкова, спецыяліст па арганізацыйна-метадычнай рабоце Брэсцкай абласной арганізацыі Беларускага таварыства Чырвонага Крыжа:
– Прывучайце сябе пастаянна выконваць правілы асабістай гігіены. Гэта самы лёгкі, але вельмі важны крок да здароўя. Пачынайце кожны свой дзень з усмешкі –  змрочныя людзі хварэюць часцей. Працуйце над сабой, бо здароўе –  гэта не толькі фізічны стан, але і псіхалагічны, стан вашай душы. Чалавек павінен знаходзіцца ў спакоі, у гармоніі з сабой і навакольнымі. Быць ветлівым і з добрым настроем – тады і самаадчуванне будзе лепшым.
Аляксей Сапежук, стаматолаг:
– Прынцыпы здаровага ладу жыцця вядомыя многім, так што першаадкрывальнікам не буду. Тым не менш, гадаю яшчэ раз: не курыце, не злоўжывайце спіртным, не грэбуйце сном. Для дарослых здаровы сон –  гэта мінімум 8 гадзін у суткі. Піце як мага больш звычайнай чыстай вады. Ну, і не забывайце кожны дзень –  раніцай і ўвечары перад сном – чысціць зубы. Хачу адзначыць, што няправільнае харчаванне ўплывае і на стан зубоў. Недастатковая колькасць вітамінаў у ежы можа прывесці да таго, што ў хуткім часе вам давядзецца наведаць стаматолага. Наогул, лепш гэта рабіць адзін раз у паўгода, нават калі вы ўпэўнены, што ў вас самыя здаровыя зубы.
Клоўны валанцёрскай Акадэміі добраахвотніцтва БрДУ імя А.С. Пушкіна:
– Рабіце кожную раніцу зарадку для ўзняцця настрою і ўмацавання мышцаў. Усміхайцеся як мага больш і часцей. Не забывайце і пра добрыя справы –  рабіце іх хаця б разок у дзень. Стаўцеся з пазітывам да ўсяго, што не здарылася, радуйцеся кожнаму імгненню жыцця. Любіце людзей, і яны абавязкова адкажуць вам тым жа.

Меркаванні выслухала Сабіна ГАРАЕВА,
студэнтка БрДУ імя А. С. Пушкіна.
Фота аўтара.