Сітуацыя па інфекцыях, якія перадаюцца праз укусы насякомых, застаецца напружанай
Аб тым, што кляшчы небяспечныя, многія ведаюць. Яны з’яўляюцца пераносчыкамі шэрагу хвароб, самая сур’ёзная з іх – клешчавы энцэфаліт, лячэнне якога цяжкае, здараюцца і лятальныя зыходы. Яшчэ адна сур’ёзная хвароба – Лайм-барэліёз, якая пашкоджвае скуру, нервовую сістэму, апорна-рухальны апарат і сэрца.
Чакаць таго, што клешчы вымерзлі пад уздзеяннем нізкіх тэмператур сёлетняй зімой, не даводзіцца. Яны хаваюцца ад холаду пад апалым лісцем і становяцца актыўнымі ўжо пры 5 градусах цяпла. Пасля анамальна цёплага надвор’я ў лютым кляшчы не прымусілі сябе доўга чакаць – яны ўжо прачнуліся. Перыяд зімняй спячкі істотна скараціўся. Летась кляшчы былі знойдзены яшчэ 26 снежня, а ў гэтым годзе першыя выяўлены ў другой дэкадзе лютага ў Чырвоным Двары Брэсцкага раёна.
На жаль, у сярэдзіне лютага з’явіліся і першыя пацярпелыя ад укусаў насякомых: два выпадкі ў Брэсцкім раёне, 1 – у Кобрынскім, якія здарыліся на тэрыторыі прыватных домаўладанняў. У першай дэкадзе сакавіка таксама пацярпелі два чалавекі – у парку воінаў-інтэрнацыяналістаў і на прыватным падворку ў Брэсце. Пры лабараторных даследаваннях знятых з людзей насякомых высветлілася, што яны заражаныя барэліямі.
Сітуацыя ў вобласці па інфекцыях, якія перадаюцца праз укусы кляшчоў, у апошнія гады застаецца напружанай. Так, летась зарэгістравана 27 выпадкаў клешчавага энцэфаліту і 134 – Лайм-барэліёзу. Цяпер насякомыя ёсць не толькі ў лесе, але і ў гарадскіх парках, зонах садова-агародных таварыстваў. Сярод верагодных месцаў нападзення насякомых – двары прыватных дамоў, гаражы, тэрыторыі ля вадаёмаў, могілкі і нават новабудоўлі, дзе несвоечасова праводзяцца работы па добраўпарадкаванні і касьбе травы.
Цёплае надвор’е вясновых месяцаў і далей будзе спрыяць актыўнасці кляшчоў. Таму, каб пазбугнуць іх укусаў, пры выездзе на дачу, пікнік, пры нарыхтоўцы бярозавага соку, правядзенні спартыўных мерапрыемстваў і г.д. трэба быць асяцярожным і клапаціцца аб індывідуальнай абароне. Нагадаю, што захаванне простых рэкамендацый пазбавіць вас ад непрыемнасцей. Таму апранайцеся так, каб максімальна былі закрыты адкрытыя ўчасткі цела (зашпільвайце адзенне, запраўляйце штаны ў боты, на галаву – касынка ці капюшон). Кожныя дзве гадзіны праводзьце самаабследаванне. Выкарыстоўвайце рэпеленты, якія можна купіць у аптэках і магазінах. Для адпачынку выбірайце сухія сасновыя лясы ці паляны з мінімальнай расліннасцю. Своечасова прыбірайце смецце ў двары, на садовым участку. Жывёлы выпасвайце на акультураных лугах. Аглядайце хатнюю жывёлу і вызваляйце яе ад кляшчоў.
Калі клешч усё ж укусіў, акуратна пазбаўцеся ад яго ніткай, завязанай ля хабатка, ці пінцэтам выдаліце, разгойдваючы галоўку насякомага і павярнуўшы кляшча супраць гадзіннікавай стрэлкі. Месца ўкусу прыпячы ёдам ці іншым спіртаўтрымліваючым растворам. Калі не можаце самі выдаліць насякомае, звяртайцеся ў бліжэйшую медыцынскую ўстанову. Калі ў наступныя дні будзеце сябе дрэнна адчуваць, звярніцеся да ўрача-інфекцыяніста. Само насякомае можна даставіць на даследванне ў адзін з цэнтраў гігіены і эпідэміялогіі (Брэст, Баранавічы, Бяроза, Кобрын, Пружаны) ці ў вірусалагічную лабараторыю ў абласным цэнтры (пл. Свабоды, 8).
“Сезон палявання” ў кляшчоў пачаўся рана – таму будзьце ўважлівымі!
Нэлі ГІНДЗЮК, галоўны дзяржаўны санітарны ўрач Брэсцкай вобласці.
Кляшчы прачнуліся і нападаюць
