Прынцып узаемнасці

павінен захоўвацца ў інфармацыйным супрацоўніцтве дзвюх краін
Напрыканцы кастрычніка ў Мінску, у Інстытуце журналістыкі Белдзяржуніверсітэта, адбылася навукова-практычная канферэнцыя “Медыясфера Расіі і Беларусі ва ўмовах сучасных геапалітычных трансфармацый”. Грамадскія дзеячы дзвюх краін  і Саюзнай дзяржавы, кіраўнікі і эксперты вядучых аналітычных і сацыялагічных цэнтраў, прадстаўнікі сродкаў масавай інфармацыі, сярод якіх былі і брастаўчане, паспрабавалі даць рэальную ацэнку рэалізацыі Плана мерапрыемстваў па стварэнні адзінай інфармацыйнай прасторы Саюзнай дзяржавы на 2007-2010 гады і выпрацаваць рэкамендацыі па ўдасканаленні сумеснай дзейнасці ў інфармацыйнай сферы на бліжэйшы час.
Усе выступоўцы, як адзін, гаварылі аб ключавой ролі СМІ ў палітычным і сацыяльна-эканамічным жыцці, іх асаблівай значнасці ў развіцці інтэграцыйных працэсаў.
Адзначаючы, што Беларусь ніколі не абмяжоўвала сваю інфармацыйную прастору – у нас распаўсюджваецца звыш 5 тысяч расійскіх выданняў, міністр інфармацыі Беларусі Алег Праляскоўскі лічыць: у інфармацыйным супрацоўніцтве Беларусі і Расіі павінен захоўвацца прынцып узаемнасці.
Цалкам магчыма стварыць адзіную інфармацыйную прастору, не без падстаў сцвярджаў прэзідэнт Міжнароднай Еўразійскай акадэміі тэлебачання і радыё Алег Папцоў, але “нам патрэбна праўда”. Ды як яе знайсці? А калі знаходзім – як яе падаць? “Адна з найпершых задач – стварыць заслону абалваньванню народаў”, – казаў расійскі госць.
Як паказалі даследаванні, расіяне ведаюць пра нас значна менш, чым мы – пра іх. Беларусы могуць падпісацца на любую расійскую газету, а ў Расіі выпісаць беларускае выданне чамусьці праблематычна. І пра такія прыкрыя факты з горыччу гаварыў генеральны дырэктар БЕЛТА Дзмітрый Жук. Ды толькі, па меркаванні многіх удзельнікаў форуму, калі мы сабраліся разам і з улікам таго, што рускі і беларускі народы хочуць будаваць Саюзную дзяржаву, рэальна паўплываць на яе будучае развіццё. І гэта таксама залежыць ад нас, журналістаў. Ад нашай адказнасці…
Галіна МАЗІНА, “НТ”,
г. Мінск.