Штодзень з гаспадарак Брэстчыны на прыёмныя пункты паступае каля 9 тысяч тон цукровых буракоў

Натхнёныя небывалым ураджаем хлеба і высокай узнагародай за перамогу ў рэспубліканскім спаборніцтве на жніве, якую на “Дажынках-2012” у Горках старшыні аблвыканкама Канстанціну Сумару ўручыў Прэзідэнт краіны Аляксандр Лукашэнка, земляробы Брэстчыны працягваюць асеннія палявыя работы.
Уборка цукровых буракоў – адна з галоўных. Салодкія караняплоды вырошчваліся на плошчы 22903 гектары. Па стане на 26 верасня яны былі выкапаны на 4474 гектарах. Найбольш актыўна ўборка цукровых буракоў вядзецца ў Жабінкаўскім (44,4% да ўборачнай плошчы), Іванаўскім (28,7%), Ляхавіцкім (24,2 %) і Пружанскім (22,2%) раёнах. З поля салодкія караняплоды адвозяцца на буракапрыёмныя пункты.
Ураджайнасць цукровых буракоў радуе. У сярэднім па вобласці кожны гектар дае па 408 цэнтнераў, што значна вышэй, чым летась. У Іванаўскім раёне атрымліваюць больш за 450, у Камянецкім – больш за 460 цэнтнераў салодкіх караняплодаў. Ну, а роўных няма ляхавіччанам: тут з кожнага гектара накопваюць амаль па 485 цэнтнераў.
Адначасова з уборкай цукровых буракоў сельгаспрадпрыемствы вядуць іх продаж дзяржаве. У лік дзяржзаказу яны рэалізавалі ўжо больш за 142 тысячы тон салодкіх караняплодаў, што складае 17,5 працэнта да плана.
Надзея ВЕРАС, “НТ”.