Яшчэ не сціхлі водгаласы нядаўняга тэатральнага форуму “Белая Вежа-2012”, а Брэст зноў рыхтуе падмосткі. Чарговы фестываль, але ўжо з прыстаўкай “кіна” літаральна топчацца на парозе і гучна грукае ў дзверы. Да нас спяшаюцца айчынныя кінематаграфісты, замежныя госці і проста тыя, хто лічыць знаходку братоў Люм’ер важным дасягненнем цывілізацыі. Дарэчы, у лік апошніх варта ўключыць і брастаўчан. За перыяд існавання нацыянальнага кінафестывалю гасцінныя гаспадары прасякнуліся да яго неверагоднай цеплынёй.
У афішы VIII Рэспубліканскага фестывалю беларускіх фільмаў, які працягнецца з 29 верасня па 2 кастрычніка, 51 назва. Заявак было значна больш, прызнаюцца члены аргкамітэта, але, каб адглядзець хаця б гэта, журы давядзецца працаваць не складаючы рук: хранаметраж асенняга кінамарафону налічвае 28 гадзін. “Паляваць” на крыштальных буслікаў – імі па традыцыі прадстаўлены галоўныя прызы форуму – будуць стваральнікі 9 гульнявых, 6 анімацыйных, 19 дакументальных і 17 студэнцкіх фільмаў. А размяркуе ўзнагароды каманда дасведчаных суддзяў на чале з Сяргеем Лазаруком, першым намеснікам старшыні Саюза кінематаграфістаў Расіі.
Па словах дырэктара фэсту Галіны Шынкар, у даволі насычаную праграму арганізатары ўціснулі таксама сустрэчы з тымі, кім не раз даводзілася захапляцца па той бок блакітнага экрана. Да прыкладу, новы фільм “Немец” фестывальнай публіцы прэзентуе Анатоль Кузняцоў, выканаўца ролі Сухава ў фільме “Белае сонца пустыні”. Чакаюць у Брэсце і знакамітую расійскую актрысу Вольгу Астравумаву, акцёра тэатра на Таганцы Аляксандра Цуркана, Алега Несцерава, вядомага, дарэчы, не толькі працай у кіно, але і шэрагам паспяховых музычных праектаў. Апошні прывязе на форум стужку “Выкрасці Бельмандо”. Зноў з’явіцца на брэсцкай чырвонай дарожцы і Ігар Угольнікаў.
– Расійскія знакамітасці ўсё часцей выказваюць жаданне наведаць фестываль, – паведаміла Галіна Шынкар. – Ды паклікаць усіх не дазваляюць пэўныя фінансавыя цяжкасці і насычаны працоўны графік саміх артыстаў. Сёлета хацеў прыехаць Аляксандр Панкратаў-Чорны, але ў яго не атрымалася па тэрмінах. Затое знакаміты сцэнарыст, рэжысёр Іраклій Квірыкадзэ згадзіўся прадэманстраваць свае педагагічныя здольнасці і даць майстар-клас будучым кінематаграфістам.
Аматары кіно таксама ўшануюць памяць заўчасна памерлага Аляксандра Колбышава. Яго стужка “Ваўкі” атрымала гран-пры на мінулым фестывалі. Гледачам пакажуць ролік “Жаданне жыць”, прысвечаны таленавітаму рэжысёру. Ну, а разгорнуцца фестывальныя відовішчы ў паўцёмных залах кінатэатраў “Беларусь” і “Мір”. Менавіта туды на сустрэчу з кіно запрашаюцца ўсе неабыякавыя да гэтага чароўнага віду мастацтва.
Ніна ЛЕАНАВЕЦ, “НТ”.
Заўтра ў кінатэатры “Беларусь” адкрываецца VIII Рэспубліканскі фестываль беларускіх фільмаў
