У абласным цэнтры гігіены, эпідэміялогіі і грамадскага здароўя прайшла прэс-канферэнцыя, прысвечаная праблеме ўздзеяння холаду на чалавека
Цёплае надвор’е ў снежні і палове студзеня прытупіла нашу пільнасць, а маразы, якія прыйшлі напрыканцы мінулага тыдня, многія назвалі стрэсам для арганізма. Ён, наш арганізм, не можа ў імгненне вока перабудавацца, таму паклапаціцца аб тым, каб не стаць ахвярай холаду, павінны мы самі. Такое меркаванне прагучала падчас прэс-канферэнцыі, прысвечанай праблеме ўздзеяння мінусавай тэмпературы на чалавека. Свае рэкамендацыі выказалі галоўны хірург упраўлення аховы здароўя аблвыканкама Руслан Бярозкін, загадчык апёкавага аддзялення абласной бальніцы Аляксандр Семянюк і ўрач-валеолаг абласнога цэнтра гігіены, эпідэміялогіі і грамадскага здароўя Валянціна Машэнская.
Як адзначылі спецыялісты, зіма штогод не ў самы лепшы бок змяняе медыцынскую статыстыку. З пачатку года ў вобласці да медыкаў звярнуліся па дапамогу амаль 1200 чалавек з халадовымі траўмамі, 160 з іх былі шпіталізаваны. На жаль, двое памерлі ад пераахалоджвання. У медыцынскія ўстановы ў студзені па дапамогу ўжо звярнуліся больш за 2 тысячы чалавек з рознымі траўмамі: пераломы, вывіхі і інш.
Мы ведаем, што працяглы ўплыў холаду прыводзіць да абмарожання, але, па словах Аляксандра Семенюка, людзі забываюць пра небяспеку; між тым, у 60 працэнтаў пацыентаў, якія сур’ёзна пацярпелі ад холаду, усё заканчваецца ампутацыяй канечнасцей і інваліднасцю.
– Хачу засяродзіць увагу на тым, што 90 працэнтаў грамадзян, якія атрымалі абмарожанне (у пераважнай большасці – мужчыны), знаходзіліся ў стане алкагольнага ап’янення. Гэта ілюзія, што спіртное ў халодную пару сагравае. Адначасова павышаецца цеплааддача арганізма, і атрымаць халадовую траўму можна хутчэй. Чалавек крытычна не ацэньвае свой стан – а значыць, не можа своечасова заўважыць пагрозу здароўю.
– Калі вы бачыце чалавека, што ляжыць на зямлі, – не праходзьце міма, – заклікае Руслан Бярозкін. – Выклікайце “Хуткую”, а не адварочвайцеся са сварлівымі словамі ў адрас п’янчугі. Сітуацыі ж бываюць розныя: хтосьці перабраў са спіртным, а ў дыябетыкаў на вялікім марозе можа здарыцца кома, у кагосьці – гіпертанічны крыз, зрыў сардэчнага рытму. І памятайце пра бяспеку дзяцей (20-ці ўжо была аказана сёлета дапамога па прычыне абмарожання і траўм).
Калі ўсё ж такі чалавек трапляе ў абдымкі марозу, дык самалячэнне катэгарычна забаронена. Ніякіх гарачых ваннаў, печак, бо пры хуткім адаграванні часта не аднаўляецца крываток – таму і адбываецца некроз тканак. Да прыезду ўрача пацярпелага можна сагрэць: напаіце яго цёплым чаем, захутайце ў коўдру, на абмарожаную паверхню накладзіце цеплаізаляцыйную павязку (у крайнім выпадку – світар, шаль), а калі гэта канечнасць – яе варта абезруховіць.
Простыя ў выкананні рэкамендацыі дае і Валянціна Машэнская:
– Правільна апранайцеся зімой: раўнамерна, шматслойна, пачынаючы з баваўнянай маечкі і заканчваючы цёплай курткай ці паліто. Не выходзьце на мароз без рукавіц, шапкі і шаліка. Калі мерзнуць вушы, дык трэба зняць нават завушніцы. Карыстайцеся ахоўным крэмам для твару. Гуляючы з дзіцём, памятайце пра час, а сагрэцца можна, зайшоўшы ў аптэку, магазін, майстэрню… І не выходзьце на мароз галоднымі, інакш вашаму арганізму не хопіць энергіі, каб сагрэцца.
Зручны абутак, правільная бялізна і вопратка, элементарная ўвага да тэмпературы паветра, адмова ад курэння на марозе, табу на алкаголь – усё разам дапаможа засцерагчыся ад холаду. З зімой трэба сябраваць – і тады ніякія халады не сапсуюць ні настрою, ні здароўя.
Ганна ІВАШЧАНКА,
студэнтка
БрДУ імя А.С. Пушкіна.
Сябраваць з зімой
