Беларусь

Кіраўнік вобласці прадставіў свайго новага намесніка Андрэя Клеца


Кіраўнік вобласці адразу ж зазначыў: “Участак працы – складаны. Але ў Андрэя Анатольевіча ёсць значны вопыт работы”. Таму губернатар спадзяецца на тое, што наваспечаны намеснік пакажа эфектыўнасць працы, на якую ён разлічвае. Высокую эфектыўнасць!
Так як адным намеснікам у старшыні аблвыканкама стала больш, былі перагледжаны іх функцыянальныя абавязкі. Цяпер пытанні эканомікі (большасць з іх), цэнаўтварэння, маёмасных адносін, інвестыцыйнай палітыкі, гандлю, рэгіянальных сувязей, прадпрымальніцтва і… (пералік далёка не поўны) ускладзены на Андрэя Клеца, які дагэтуль паспяхова працаваў на пасадах кіраўніка адміністрацыі Ленінскага раёна г. Брэста і старшыні камітэта эканомікі аблвыканкама, а яшчэ раней узначальваў падатковую інспекцыю ў Кобрыне.
Нягледзячы на даволі прыкметныя дасягненні ў развіцці народнагаспадарчага комплексу, кіраўнік вобласці спыніўся на пытаннях, якія патрабуюць першачарговай увагі. І не проста патрабуюць – іх неабходна вырашаць. На думку Канстанціна Андрэевіча, з улікам памылак і недахопаў трэба сур’ёзна паправіць работу па асобных кірунках. І пачаў ён з камітэта па сельскай гаспадарцы і харчаванні аблвыканкама: “Быццам бы ўсё тут робіцца. Але не хапае наступнага: тое, чаму вучылі іншых, не даводзіцца да лагічнага завяршэння”. Хоць спецыялісты і замацаваны за рэгіёнамі, гаспадаркамі, ды чамусьці назіраецца “таптанне на месцы”. Правялі мерапрыемства і на тым – кропка. Навідавоку – кампанейшчына, заявіў Канстанцін Сумар.
Ён таксама ўзгадаў існуючыя праблемы ў жывёлагадоўлі, адну з самых надзённых – кармавую базу, абслугоўванне здадзеных у эксплуатацыю сучасных даільных залаў. Пасля чаго закрануў работу камітэта эканомікі. Губернатар перакананы: на высокім узроўні прааналізаваць дзейнасць таго ці іншага прадпрыемства можна тады, калі спецыяліст пабывае ў калектыве і пабачыць усё на свае вочы, а не зыходзячы з “плюсаў” і “мінусаў” статыстычных дадзеных. Калі будуць зразумелымі прычыны “мінусаў” – тады знойдуцца дакладныя варыянты для іх выпраўлення. А яшчэ Канстанцін Андрэевіч “прайшоўся” па інвестпалітыцы, аптымізацыі рабочых месцаў, развіцці прадпрымальніцтва, рабоце з дзяржмаёмасцю, эканомным выкарыстанні бюджэтных сродкаў…
Падагульняючы сваё выступленне, кіраўнік вобласці зазначыў: “Мы сёлета будзем ацэньваць работу кіраўніка менавіта па эканамічных паказчыках. Таму ў любым упраўленні ці аддзеле варта зразумець: эфектыўнасць работы павінна стаць прыярытэтам… Ад нашай з вамі працы залежыць стан спраў не толькі ў эканоміцы, а ў цэлым у той сям’і, што завецца “жыхары Брэсцкай вобласці”.
Галіна МІХАЛЕВІЧ, “НТ”.

Добавить комментарий

Авторизация
*
*
Генерация пароля