Сёння ў Ляхавічах адкрываецца раённая паліклініка

Рэканструкцыя працягвалася амаль год. Ва ўпраўленні капітальнага будаўніцтва райвыканкама, якое выступала заказчыкам на гэтым аб’екце, паведамілі, што ўсе работы выкананы з высокай якасцю. Генеральны падрадчык будоўлі – ПМК-13 трэста “Пінсксаўгасбуд” – пастараўся, каб у адноўленым будынку медыцынскай установы ўтульна адчувалі сябе і медработнікі, і пацыенты.
Побач са старым корпусам паліклінікі вырас новы – прыгожы, дыхтоўны, сучасны. Тут размясціліся кабінеты ўрачоў, рэгістратура, ёсць ліфт для цяжкіх хворых. На рэканструкцыю выдаткавана з бюджэту каля 24 мільярдаў рублёў.

Нагадаем, летась на абласных дажынках кіраўнік вобласці Канстанцін Сумар паабяцаў ляхавіччанам, што ў іх раёне яшчэ будуць наваселлі. Як бачым, сваё слова ўлада трымае.
Віктар СЛАВІН, “НТ”,
г. Ляхавічы.