СОЛІ ХОПІЦЬ УСІМ

14 вагонаў запатрабаванага берасцейцамі прадукту прыбудуць у бліжэйшы час
Асабіста мне такога назіраць раней не даводзілася: за апошнія некалькі дзён з прылаўкаў магазінаў знікла соль. Небывалы ажыятаж назіраецца ва ўсіх гандлёвых кропках. Навошта ж людзі, нібыта плюшкіны, назапашваць невядома які стратэгічны запас? Што яны потым будуць рабіць з гэтым “скарбам”, скарыстацца якім можна будзе толькі з дапамогай малатка – няйнакш? Ці ёсць падстава скупляць соль?
Як паведамілі ва ўпраўленні гандлю і паслуг, сітуацыя пад кантролем – солі хопіць усім.
– З базай “Бакалея” ўзгоднена да пастаўкі 14 вагонаў солі, у тым ліку 8 – для Брэста, – расказаў 19 мая намеснік начальніка ўпраўлення гандлю і паслуг аблвыканкама Сяргей Абрамчук. – Таму не варта паддавацца неабгрунтаваным хваляванням і скупаць у велізарнай колькасці соль.
У дадзенай сітуацыі пацярпелі людзі, якім неабходна соль з-за таго, што яна проста скончылася, а яны не змаглі купіць нават пачак – затое хтосьці дома стварыў склад.  У гэтай сувязі хочацца параіць: перад тым, як траціць грошы на бессэнсоўныя пакупкі, задумайцеся над тым, што будзеце рабіць з такімі буйнымі запасамі. Тым больш, што адной соллю сыты не будзеш…
Вольга СВІРЫДОВІЧ, “НТ”.