Толькі шчаслівая выпадковасць выратавала 50 рыбакоў…

У сувязі з пацяпленнем і пад уздзеяннем сонечных промняў лядовае пакрыццё на вадаёмах Брэстчыны хутка падтайвае. Лёд з кожным днём робіцца ўсё больш порыстым, рыхлым, слабым і ўяўляе рэальную небяспеку для людзей.
Падчас крыгаходу і паводкі нават падыходзіць да краю берага вельмі небяспечна: размыты вадой, ён часта абвальваецца. Вясновы лёд асаблівую пагрозу ўяўляе для тых, хто жыве паблізу ракі, возера ці іншага вадаёма, а таксама для аматараў рыбалкі. Прывыкнуўшы зімой карыстацца сцяжынкамі і пераходамі па лёдзе, праводзіць шмат гадзін на вадаёме, многія забываюць пра небяспеку.
Настойліва рэкамендуем не рызыкаваць сваім жыццём, устрымацца ад наведвання вадаёмаў і знаходжання на лёдзе ў небяспечны перыяд. Шматлікія прыклады мінулых гадоў пераконваюць у гэтым. Так, у сакавіку 2010 года падчас раставання снегу і лёду пацярпелі 7 жыхароў Брэстчыны, а ў студзені-лютым 2011 года – 2 чалавекі. Асаблівы неспакой выклікаюць рыбакі, якія выпрабоўваюць лёс на сакавіцкім лёдзе шматлікіх вадаёмаў вобласці. Перадумова для надзвычайнага здарэння мела месца на возеры Белае ў Бярозаўскім раёне 9 сакавіка 2011 года, калі прыблізна 50 рыбакоў апынуліся ў крытычнай сітуацыі на адколатай крызе, якая свабодна дрэйфавала на паверхні вадаёма. І толькі па шчаслівай выпадковасці ніхто не патануў.
Беражыце сябе і захоўвайце элементарныя правілы бяспекі!
Рамуальд САДОЎСКІ,
старшыня Брэсцкага
абласнога савета ТВВАД.