Беларусь

  • Главная
  • Актуальна!
  • У Генеральным консульстве Рэспублікі Польшча ў Брэсце ў сераду адкрылася выстава “Ад “Салідарнасці” да “Круглага стала”

У Генеральным консульстве Рэспублікі Польшча ў Брэсце ў сераду адкрылася выстава “Ад “Салідарнасці” да “Круглага стала”


Ва ўрачыстай цырымоніі прынялі ўдзел Генеральны консул Ганна Навакоўска (на здымку – у цэнтры), прадстаўнікі дыпламатычных місій іншых краін, а таксама творчай інтэлігенцыі горада над Бугам, у ліку якіх былі вядомыя мастакі, пісьменнікі, музыканты, журналісты, навукоўцы, супрацоўнікі ўстаноў культуры.
З уступным словам да прысутных звярнулася Ганна Навакоўска, якая расказала аб тым, што “выстава прысвечана знамянальнай падзеі ў жыцці Польшчы – 25-годдзю пасяджэнняў “Круглага стала” і першых пасля Другой сусветнай вайны дэмакратычных выбараў”. Дарэчы, летась польскі сейм абвясціў 4 чэрвеня нацыянальным святам – Днём свабоды і правоў чалавека. Тым самым адзначана значэнне парламенцкіх выбараў 1989 года ў гісторыі Польшчы, у выніку якіх пераканаўчую перамогу атрымаў “Грамадзянскі камітэт “Салідарнасць” на чале з Лехам Валенсай.
Пра асноўныя вехі станаўлення “Салідарнасці”, як прафсаюза, грамадзянскага камітэта, а затым і партыі, расказваюць экспанаты выставы. Асноўнае месца сярод іх займаюць фотаздымкі вядомага ў Польшчы мастака, фатографа і журналіста Эразма Цёлека.
Яго творчы шлях пачынаўся ў час забастоўкі рабочых Гданьскай судаверфі ў 1980 годзе, ён удасканальваў сваё майстэрства разам з “Салідарнасцю”, а затым і ўвогуле стаў яе, так бы мовіць, “штатным” фотакарэспандэнтам. На здымках, паказаных на выставе, адлюстравана Польшча ў самыя складаныя, напружаныя, гарачыя моманты яе сучаснай гісторыі: пасяджэнне “Круглага стала”, паўстанне, якое ўзначальвала “Салідарнасць”, ваеннае становішча, уведзенае ў краіне тагачасным прэзідэнтам Войцэхам Ярузельскім, выбарчая кампанія ў сейм і сенат 1989 года… Знакамітым на ўсю Польшчу Эразм Цёлек стаў пасля таго, як зрабіў сваю самую вядомую серыю фотаздымкаў – кандыдатаў на парламенцкіх выбарах 1989 года ад партыі “Салідарнасць”.
З вялікай цікавасцю знаёміліся госці з экспанатамі выставы. Пэўныя тлумачэнні давалі Ганна Навакоўска і іншыя супрацоўнікі генконсульства, яны адказалі і на шматлікія пытанні.
– Цікавая выстава, мне спадабалася, – падзяліўся сваімі ўражаннямі вядомы беларускі гісторык і пісьменнік-дакументаліст Леанід Несцярчук. – Польшча адкрылася для мяне яшчэ адной гістарычнай і творчай старонкай.
З ім салідарны і дырэктар КУП “Брэстаблкінавідэапракат” Вячаслаў Шахлевіч:
– Мне таксама было цікава. Я, як і многія іншыя ўдзельнікі сённяшняй імпрэзы, адкрыў для сябе новае імя і творчасць фотамастака Эразма Цёлека.
Вячаслаў БУРДЫКА, “НТ”.

У Генеральным консульстве Рэспублікі Польшча ў Брэсце ў сераду адкрылася выстава “Ад “Салідарнасці” да “Круглага стала”
Оцените статью

Добавить комментарий

Авторизация
*
*
Генерация пароля