Брэсцкае аддзяленне Беларускай чыгункі перайшло на летні расклад руху цягнікоў

Напярэдадні з гэтай нагоды адбылася прэс-канферэнцыя для прадстаўнікоў мясцовых сродкаў масавай інфармацыі. У ёй прынялі ўдзел першы намеснік начальніка Брэсцкага аддзялення Беларускай чыгункі Ігар ЖАРАЛО, начальнік пасажырскага аддзела Валерый ГЕРАСІМАЎ, начальнік вакзала станцыі Брэст-Цэнтральны Віктар КУЛАЙ і начальнік бюро па размеркаванні білетаў Ала НОСІК. Яны расказалі аб зменах, якія адбыліся ў руху пасажырскіх цягнікоў, і адказалі на пытанні журналістаў.
АД МАСКВЫ ДА БРЭСТА…
Новы расклад руху пасажырскіх цягнікоў (публікуецца на 11-й стар.) распрацаваны на падставе аналізу памераў і структуры пасажырапатоку, а таксама з улікам пажаданняў саміх пасажыраў. За аснову яго ўзяты ранейшы графік.
Пасажырскія перавозкі, якія ажыццяўляюцца транспартам агульнага карыстання, маюць шырокую геаграфію. Наш абласны цэнтр у міжнародных зносінах звязаны з Масквой, Санкт-Пецярбургам, Навасібірскам, Караганды, Саратавам, Варшавай, Парыжам, Ніццай, Прагай і іншымі гарадамі Еўропы і Азіі. Акрамя цягнікоў, у міжнародных зносінах працягваюць курсіраваць бесперасадачныя вагоны на Адлер, Мінеральныя Воды, Сургут, Мурманск, а ў летні перыяд – яшчэ і на Анапу, Сімферопаль.
Бадай, адзіным сур’ёзным змяненнем у раскладзе руху на міжнародных лініях з’яўляецца тое, што цягнік №196/195 “Брэст – Масква – Брэст” пераведзены ў катэгорыю хуткага з прысваеннем нумара 96/95. Акрамя таго, цягнік “Масква – Парыж” замест трох разоў на тыдзень цяпер ходзіць 5 разоў, а цягнік “Прага – Масква”, наадварот, зменшыў колькасць рэйсаў з трох да двух.
НА ЎКРАІНСКІМ НАПРАМКУ
Напэўна, найбольшую цікавасць у чытачоў выклікае рух цягнікоў у паўднёвым напрамку. І гэта зразумела: набліжаецца летні адпускны перыяд, а трывожная сітуацыя ва Украіне прымушае многіх берасцейцаў, якія разлічвалі адпачыць на чарнаморскіх пляжах, уносіць карэктывы ў свае планы. Як паведаміў Ігар Жарало, літаральна да апошняй мінуты напярэдадні прэс-канферэнцыі ішлі перамовы з украінскімі калегамі па ўзгадненні графікаў руху пасажырскіх цягнікоў па тэрыторыі гэтай краіны. У рэшце рэшт узгаднілі.
Аднак засталося мноства нюансаў, якія адмоўна ўплываюць на якасць абслугоўвання. Напрыклад, бесперасадачны вагон “Брэст – Сімферопаль” амаль цэлы дзень, каля васьмі гадзін, стаіць на станцыі Гомель: чакае, пакуль яго перачэпяць да цягніка “Полацк – Сімферопаль”. Ігар Уладзіміравіч параіў пасажырам: гэты час правесці з карысцю і пазнаёміцца са славутасцямі цудоўнага горада над Сожам.
Яшчэ адна праблема: беларускія цягнікі, якія ідуць у бок расійскіх курортных зон, на тэрыторыі Украіны маюць права толькі на тэхнічныя прыпынкі, таму білеты да ўкраінскіх станцый на іх не прадаюцца. Не прадаюцца білеты ў Беларусі і на цягнік “Хаціслаў – Ковель”, іх можна набыць непасрэдна ў цягніку ў білетных касіраў. Ясна, што пасажырапаток у сувязі з гэтым не павялічыцца – хоць бы той захаваць, што быў раней
ПОЛЬСКІ АСПЕКТ
Пэўныя складанасці ўзніклі на заходнім напрамку. У сувязі з рамонтнымі работамі на польскім баку з 16 чэрвеня будзе спынены рух цягнікоў па так званым пасажырскім чыгуначным мосце  цераз Буг, і ўсе –
і пасажырскія, і грузавыя – саставы з Брэста ў Еўропу ідуць па гора-дзе на Брэст-Паўночны і далей на мост, які раней абслугоўваў толькі грузавыя цягнікі. У выніку ўзрасце напружанасць на пяці чыгуначных пераездах у гэтым раёне абласнога цэнтра: на вул. Лейтэнанта Рабцава; перакрыжаванні  вуліц  Паплаўскага – Дворнікава; вул. Смірнова; вул. Чырвонагвардзейскай; вул. Фартэчнай.
Кіраўніцтва Брэсцкага аддзялення чыгункі прыносіць свае прабачэнні вадзіцелям аўтатранспарту і ўсім брастаўчанам, якія карыстаюцца гэтымі пераездамі, і просіць пацярпець паўгода (да 13 снежня), пакуль, як абяцаюць палякі, мост зноў не вернецца ў строй дзеючых.
У МІНСК ЗА 3 ГАДЗІНЫ 15 МІНУТ!
На міжрэгіянальных лініях найбольш істотнай падзеяй стала ўвядзенне новага цягніка бізнес-класа №702/701 “Брэст – Мінск – Брэст”, які адпраўляецца са станцыі Брэст-Цэнтральны ў 06.20, ідзе без прыпынкаў і прыбывае ў сталіцу ў 09.35. За кошт гэтага час знаходжання ў дарозе складае ўсяго 3 гадзіны 15 мінут! Абслугоўвае маршрут сучасны камфартабельны электрацягнік “Stadler”. З Мінска ў зваротны шлях ён адпраўляецца ў 16.45 і прыбывае ў наш абласны цэнтр у 20.00. Вельмі зручна, хутка і камфортна! Пасажыры, якія паспелі ўжо ім скарыстацца, задаволены.
Праўда, пакрыўджанымі аказаліся жыхары населеных пунктаў на ўчастку Брэст – Баранавічы, якія раней ездзілі ў сталіцу адмененым цягніком №646/645. Аднак у аддзяленні дарогі пра іх не забылі: праз 10 мінут пасля хуткага “Stadler”а з абласнога цэнтра адпраўляецца цягнік міжрэгіянальных ліній эканом-класа №668 “Брэст – Мінск” з прыпынкамі па станцыях Жабінка, Тэўлі, Аранчыцы, Бяроза-Горад, Івацэвічы, Баранавічы-Цэнтральныя. Ён знаходзіцца ў дарозе на гадзіну больш і прыбывае ў сталіцу ў 10.49. У суботу, нядзелю і панядзелак на гэтым маршруце курсіруе электрацягнік, а ў аўторак, сераду, чацвер і пятніцу – састаў з купэйных і плацкартных пасажырскіх вагонаў.
На лініях міжрэгіянальных зносін прадугледжаны таксама штодзённы цягнік №608 “Брэст – Мінск” (праз Лунінец), адпраўленне з Брэста ў 23.41, прыбыццё ў Мінск у 08.04. Акрамя таго, паскорана прыбыццё ў горад над Бугам цягнікоў №603 “Гомель – Брэст” (у 06.01), №657/661 “Віцебск/Камунары – Брэст” (у 07.42) і №606 “Віцебск – Брэст” (у 08.38).
На рэгіянальных лініях бізнес-класа на ўчастку Брэст – Баранавічы – Брэст з 1 мая чатырохвагонны электрацягнік “Stadler” заменены на больш умяшчальны і камфартабельны пяцівагонны. З 1 чэрвеня змянілася іх нумарацыя з 832/836 на 731/766.
На рэгіянальных лініях эканом-класа значных змен не адбылося. На летні перыяд (да 28 верасня 2014 года ўключна) назначаны дадатковыя цягнікі №6332/6333 “Брэст – Маларыты – Брэст” (што-дзённы, адпраўленне з Брэста ў 09.03, з Маларыты – 07.18) і “Брэст – Дубіца – Брэст” (адпраўленне з Брэста ў 07.43, з Дубіцы – 10.31).
ЗА БІЛЕТАМ – ДА… АЎТАМАТА
А цяпер некалькі навін у сферы арганізацыі абслугоўвання пасажыраў. Па-першае, выдатна зарэкамендаваў сябе электронны продаж білетаў. Валерый Герасімаў прывёў такія лічбы. Калі ў першы месяц было рэалізавана толькі… 8 электронных білетаў, дык цяпер штомесяц іх выкупляецца 12 – 14 тысяч. Валерый Уладзіміравіч пры гэтым падкрэсліў, што білет такі неабходна не проста купіць, але і там жа, у электроннай сістэме, яго зарэгістраваць. Тады не трэба перад адпраўленнем цягніка звяртацца для рэгістрацыі ў білетныя касы.
Яшчэ адна тэхналагічная навіна, якая павінна зменшыць чэргі, – спецыяльныя аўтаматы па продажу білетаў на цягнікі эканом-класа. Да канца сёлетняга года на вакзале станцыі Брэст-Цэнтральны будзе ўстаноўлена 12 такіх аўтаматаў. Разлічыцца тут можна з дапамогай электроннай грашовай карткі.
Як на завяршэнні прэс-канферэнцыі запэўніў Ігар Жарало, кіраўніцтва аддзялення робіць усё магчымае для таго, каб палепшыць якасць сваёй работы і стварыць найлепшыя ўмовы для пасажыраў.
Вячаслаў БУРДЫКА, “НТ”.