Беларусь

Упэўненыя крокі “Таптышкі”


Шматгадовы партнёр сельгаспрадпрыемстваў Берасцейшчыны ААТ “Маларыцкі кансерваваагароднінасушыльны камбінат” – буйнейшы ў Рэспубліцы Беларусь пастаўшчык дзіцячага харчавання і кансерваў агульнага прызначэння

У рабочым кабінеце дырэктара прадпрыемства Таццяны Камянчук, акрамя ўзнагарод, сярод якіх – 7 крыштальных яблыкаў, атрыманых за перамогу ў розных выставах (у тым ліку і міжнародных), на спецыяльным стэндзе і на стале мноства слоікаў. Гэта ўзоры прадукцыі, якую выпускаюць маларыцкія перапрацоўшчыкі. Большасць яе – маленькія слоічкі з дзіцячым харчаваннем. Яно – галоўны брэнд камбіната.
Фруктовыя і гароднінныя сокі і пюрэ пад гандлёвай маркай “Таптышка” палюбіліся не толькі маленькім беларускім гурманам, але і дзятве з бліжняга і далёкага замежжа. Смачная прадукцыя экспартуецца ў Расію, Казахстан, ва Украіну. Зробленыя з натуральных экалагічна чыстых фруктаў і гародніны, якія вырашчаны на палях і ў садах сельгаспрадпрыемстваў Берасцейшчыны, а таксама з сабраных у лясах ягад у экалагічна чыстай шкляной тары, яны знаходзяць свайго спажыўца і сярод дарослага насельніцтва. Так-так, цяпер дзіцячае харчаванне даволі часта выкарыстоўваюць у офісах. А чаму б і не? Мода на здароўе па-ранейшаму актуальная. А экалагічныя чыстыя фруктовыя і гароднінныя сокі, пюрэ з дабаўленнем вяршкоў, ёгуртаў, тварагу – чым не здаровае харчаванне?!.
Дырэктар прадпрыемства, якая пачынала тут сваю працоўную біяграфію 31 год таму тэхнолагам, можа гадзінамі расказваць пра прадукцыю, якую, у асноўным, вырабляюць жанчыны. Іх з 200 чалавек калектыву – прыкладна 70 працэнтаў.
– Лічу, што гэта правільна, – гаворыць Таццяна Уладзіміраўна, – бо ніхто лепш, чым жанчына, не ведае дзяцей, іх густаў і запатрабаванняў. У дзіцячае харчаванне неабходна ўкладваць часцінку сваёй душы, інакш прадукт атрымаецца не з той энергетыкай. Магчыма, таму, што нашы працаўніцы робяць яго нібыта для сваіх уласных дзяцей, пюрэ і сокі атрымліваюцца такімі смачнымі і запатрабаванымі малымі. Задаволены прадукцыяй прадпрыемства і матулі, бо ім цяпер не прыходзіцца марнаваць час на прыгатаванне розных сумесяў ці кашак, і яны могуць больш увагі ўдзяліць мужу, сям’і, заняткам з дзіцём. Спажываць нашага “Таптышку” немаўляты могуць ужо з чатырох з паловай месяцаў.
А дапамагае работніцам выпускаць якаснае дзіцячае харчаванне сучаснае імпартнае абсталяванне з элементамі аўтаматызацыі і камп’ютарызацыі. Яно з’явілася на прадпрыемстве ў 2005 годзе падчас рэканструкцыі сушыльнага цэха пад цэх па выпуску кансерваў для дзіцячага харчавання. Абсталяванне гэтае дазваляе больш глыбока перапрацоўваць сыравіну, захоўваючы ўсе яе біялагічныя і пажыўныя якасці. Дзякуючы праведзенай на прадпрыемстве мадэрнізацыі, за мінулую пяцігодку аб’ёмы вытворчасці прадукцыі ўдалося павялічыць у 5 разоў. Зараз у цэху па выпуску дзіцячага харчавання за змену з канвеера сходзіць ад 40 да 50 тысяч слоікаў сокаў і пюрэ.

Усяго ж на Маларыцкім кансерваваагароднінасушы-льным камбінаце выпускаюць каля 200 найменняў прадукцыі – больш за 150 з іх прыходзіцца на сокі, пюрэ, нектары для дзяцей. Хоць напачатку тут выраблялі толькі маркоўны ды яблычны сок.
Але не толькі дзіцячым харчаваннем славяцца маларыцкія перапрацоўшчыкі. Джэмы і варэнне камбіната лічацца лепшымі ў рэспубліцы. Вырабляюцца яны ў цэху па вытворчасці кансерваў агульнага прызначэння. Тут жа з канвеера сыходзяць сокі і паўфабрыкат з гародніны, які ў выглядзе пюрэ дазваляе захоўваць яе да 1,5 года. А ў цэху асептыкі выпускаюць яблычны сок прамога адціскання. У асептычных нержавеючых ёмістасцях ён таксама можа захоўвацца да года.
Дарэчы тут будзе сказаць пра тое, што калектыў камбіната на чале з кіраўніком пастаянна працуе над абнаўленнем асартыменту выпускаемай прадукцыі. Вынікам такой творчай дзейнасці становіцца выраб новых найменняў дзіцячага харчавання, кансерваў і сокаў агульнага прызначэння –
да 20 у год. Сёлета, напрыклад, увялі новую лінію па выпуску пюрэ і сокаў, у якіх замест цукру выкарыстоўваюць фруктозу, пачалі вырабляць морсы для спаталення смагі, соусы “Дачны”, “Маларыцкі”. Другі год выпускаюць кансервы з абляпіхай і буякамі, квяцістай капустай і капустай брокалі…
Распавядаючы пра работу калектыву, Таццяна Камянчук заўсёды выказвае словы падзякі за цеснае супрацоўніцтва партнёрам акцыянернага таварыства – кіраўнікам сельгаспрадпрыемстваў Маларыцкага, Брэсцкага, Жабінкаўскага, Камянецкага і іншых раёнаў, якія забяспечваюць якаснай разнастайнай гароднінай: зараз у гаспадарках вырошчваюць не толькі звыклыя моркву, буракі, але і кабачкі, квяцістую капусту і капусту брокалі. Цудоўныя яблыкі пастаўляюць СВК “Астрамечава” і “Агра-сад “Рассвет” Брэсцкага раёна. Згадзіцеся, добрая сыравіна –
палова поспеху перапрацоўчага прадпрыемства.
Ну, а другую палову паспяховай работы камбіната забяспечваюць кадры. Гэта, у першую чаргу, тыя людзі, што працуюць на прадпрыемстве не адзін дзясятак гадоў. Такіх тут – 60 чалавек: іх стаж – больш за 20 гадоў. І, вядома ж, каманда дырэктара: галоўны інжынер Юрый Вітрук, намеснік дырэктара Людміла Вазнасіменка, начальнік вытворчасці Валянціна Грыгарук, галоўны бухгалтар Галіна Гар-дзеева, галоўны эканаміст Наталля Салей. Таццяна Уладзіміраўна прызналася: калі стала кіраўніком –
зразумела, што значыць добрая каманда.
І яшчэ. На прадпрыемстве не без гонару гавораць пра сямейныя дынастыі і сем’і, якія працуюць тут. А традыцыю гэтую заклаў былы кіраўнік гароднінасушыльнага завода Іван Дзянісавіч Камянецкі, які разам з жонкай-эканамістам Надзеяй Сяргееўнай аддаў прадпрыемству не адзін дзясятак гадоў. Справу бацькі працягвае сын Алег – слесар па рамонце і абслугоўванні абсталявання, і нявестка Таццяна –
спецыяліст па кадрах.
Муж і жонка, маці і дачка, браты, а часам і цэлыя сем’і – нярэдкасць на камбінаце. Таму і самыя распаўсюджаныя прозвішчы тут Бурыта, Кухарчук, Рудык, Вітрук, Дзібук, Лапін, Самасюк, Бягеза, Камянчук, Астапук, Трафімук, Салей, Русавук, Палівода. Усе яны цяпер – адна вялікая сям’я. Працоўная.
Надзея ЯЦУРА, “НТ”,
г. Маларыта.

Упэўненыя крокі “Таптышкі”
Оцените статью

Добавить комментарий

Авторизация
*
*
Генерация пароля