Памер дапамогі па доглядзе дзіцяці вырасце амаль удвая

Памер дапамогі па доглядзе дзіцяці ва ўзросце да трох год вырасце амаль удвая са студзеня 2013 года. У беларускім парламенце дэпутаты разгледзелі Закон Рэспублікі Беларусь “Аб дзяржаўных дапамогах сем’ям, якія выхоўваюць дзяцей”. Адно з галоўных новаўвядзенняў – змена механізму разліку штомесячных дапамог і яго дыферэнцыяцыя ў залежнасці ад чарговасці нараджэння дзіцяці. Так, памер дапамогі будзе прывязаны не да бюджэту пражытачнага мінімуму ў сярэднім на душу насельніцтва, як цяпер, а да сярэднямесячнай заработнай платы па краіне. Прычым, калі яна паменшыцца, гэта не прывядзе да памяншэння памеру дапамог.