Яе творы бяруць за жывое, чаруюць душу. І зусім не дзіўна, бо дзяўчына піша пра тое, што яе сапраўды хвалюе, аб чым думае. Завуць незвычайную асобу Марыя Варабей, і вучыцца яна ў 9 “А” класе сярэдняй школы №33 г. Брэста.
Машы толькі 15 год, а яна ўжо неаднойчы была ў ліку пераможцаў гарадскіх і абласных літаратурных конкурсаў. Зусім нядаўна пачынаючая пісьменніца заняла першае месца ў гарадскім конкурсе літаратурнай творчасці сярод школьнікаў “Голас дзяцінства”. На думку нашай гераіні, перамагаць прыемна, але дзяўчына не збіраецца спыняцца на дасягнутым.
Пісаць Маша пачала ў 9 год, і з таго часу ў яе назбіралася шмат мініяцюр і апавяданняў. Юнай стваральніцы падабаецца апісваць пачуцці і перажыванні людзей, цікавяць яе казкі і гістарычныя творы. Аднолькава лёгка піша яна і на рускай, і на беларускай мовах. Творы школьніцы друкаваліся ў рэспубліканскіх і мясцовых газетах, у калектыўным зборніку “Адкрыццё”.
Першай з творамі Машы знаёміцца яе мама, яна ж – самы шчыры крытык. Цэняць талент юнай пісьменніцы і сябры. Аднакласнікі не перастаюць здзіўляцца яе фантазіі і працаздольнасці. Часам натхненне прыходзіць да дзяўчыны на ўроку, і тады яна можа пісаць нават на шматках паперы.
На пытанне, адкуль Марыя бярэ ідэі для твораў, яна прызнаецца: “Пішу пад уражаннем ад падзей з жыцця, але часам сюжэты бачу ў сне”.
На творчым рахунку Марыі Варабей ужо ёсць дзве аповесці ў стылі фэнтэзі. Праўда, выдаць кнігі пакуль не атрымліваецца. Зараз яна працуе над новай аповесцю “Выдуманы сябар”. Спрабуе пісаць вершы. Свае творы публікуе ў інтэрнэце на сайце “Проза.ру”.
– Маша пачала актыўна ўдзельнічаць у конкурсах з 7 класа, – расказала класны кіраўнік 9 “А” класа Наталля Дзенісюк. – Яе цяжка прымусіць пісаць “на заказ” – гэта значыць, на вызначаныя тэмы. Яна шмат чытае, самаразвіваецца. У гэтага зусім яшчэ маладога аўтара такія глыбокія творы, як быццам іх пісаў дарослы чалавек з вышыні пражытых гадоў. Хацелася б, каб у гэтай творчасці быў працяг.
Марыя Варабей – лепшая вучаніца ў класе. У мінулым навучальным годзе яна заняла прызавыя месцы на раённых алімпіядах па беларускай і рускай мовах. А яшчэ Маша з’яўляецца пачынаючай артысткай. Яна займаецца ў гуртку “Журавінка” і ўдзельнічала ў шматлікіх тэатральных конкурсах.
Акрамя таго, наша гераіня любіць беларускую літаратуру. Асабліва ёй падабаюцца творы Уладзіміра Караткевіча і Яна Баршчэўскага.
Па словах Машы, свой талент неабходна ўпарта развіваць. З-за мімалётнай слабасці не варта адмаўляцца ад сваёй мэты. Уменне ствараць свой чароўны свет з’яўляецца лепшай якасцю чалавека.
Алена ДЗЕБІШ,
г. Брэст.
Юная брэсцкая пісьменніца лічыць, што ўменне ствараць свой свет – лепшая якасць чалавека
