Сярод пераможцаў рэспубліканскага этапу экалагічных конкурсаў нямала землякоў

Сярод пераможцаў рэспубліканскага этапу экалагічных конкурсаў  нямала землякоў,
у тым ліку і журналістка “Народнай трыбуны”

Чароўныя імгнені фіналу XX Рэспубліканскага экалагічнага форуму ў Маладзечна хоць і засталіся ў мінулым, але сёння яны выклікаюць масу прыемных успамінаў у сведкаў яшчэ зусім нядаўніх падзей. Сёлетні форум прайшоў у рамках Міжнароднага года ўстойлівай энергетыкі для ўсіх і акцэнтаваў увагу менавіта на экалагічным асветніцтве чалавека. Больш за 500 айчынных і замежных дэлегатаў сталі ўдзельнікамі галоўнага экалагічнага свята краіны. Акрамя спецыялістаў у галіне аховы навакольнага асяроддзя тут былі прадстаўнікі Савета Міністраў Рэспублікі Беларусь, Палаты прадстаўнікоў Нацыянальнага сходу, рэспубліканскіх органаў дзяржаўнага кіравання, устаноў адукацыі і культуры, грамадскіх аб’яднанняў.
Дарэчы, сталіцай самага першага з падобных мерапрыемстваў у 2003 годзе была абрана Орша. Менавіта тады натуралісты з усёй краіны голасна заявілі: галоўнай умовай вырашэння праблем наваколля з’яўляецца актыўны ўдзел у іх грамадства. І на практыцы патлумачылі: сітуацыя будзе мяняцца літаральна на вачах, калі кожны з нас зробіць свой уклад на карысць прыродзе. Гэта сёлета яшчэ раз падкрэсліў у прывітальнай прамове ўдзельнікам форуму Прэм’ер-міністр Рэспублікі Беларусь Міхаіл Мясніковіч:
“…Калі кожны з нас будзе лічыць сваім абавязкам зберагчы тое, што дадзена нам прыродай, а таксама прызнае сябе адказным за будучыню нашай планеты, мы дасягнем поспеху ў захаванні нашага агульнага дома для наступных пакаленняў”.
– Да падобных пытанняў з году ў год звяртаюцца ў сваёй дзейнасці эколагі вобласці, – расказвае Тамара Ялкоўская, старшыня абласнога камітэта прыродных рэсурсаў і аховы навакольнага асяроддзя. – Так, сёлета на рэгіянальным узроўні форуму папярэднічаў шэраг тэматычных мерапрыемстваў. Гэта акцыі з красамоўнымі назвамі “Тыдзень лесу”, “Чыстае паветра”, “Дапаможам птушкам”, “Пасадзі дрэва”, “Дзень Зямлі”, штогадовы конкурс творчых работ для школьнікаў “Смецце ў рамцы” і іншыя. Усе яны былі накіраваны на захаванне чысціні нашай жыццёвай прасторы і развіццё экалагічнай адукацыі.
Фінальная частка форуму яшчэ раз пацвердзіла: брастаўчане сапраўды ўмеюць клапаціцца аб навакольным свеце. Як расказалі ў абласным камітэце прыродных рэсурсаў і аховы навакольнага асяроддзя, сёлета сярод пераможцаў рэспубліканскага этапу экалагічных конкурсаў па традыцыі ёсць берасцейцы, а ў ліку іх – журналістка “НТ” Ніна Леанавец, якая заняла ІІ месца ў спаборніцтвах на лепшую публікацыю на экалагічную тэматыку ў катэгорыі “Прафесіяналы”. Падобны вынік прадэманстраваў пастаянны ўдзельнік яшчэ адной творчай намінацыі – фотаконкурсу “Гэта твая зямля” – Сяргей Рабаў з Баранавіч. Брэсцкая гарадская ЖКГ і СТАА “Белзнештранс” замкнулі тройкі лідараў у конкурсах па максімальным атрыманні другасных матэрыяльных рэсурсаў з камунальных адходаў і спаборніцтвах на лепшую аўтатранспартную арганізацыю ў рабоце па зніжэнні забруджвання паветра адпаведна.
У скарбонцы берасцейцаў таксама тры вышэйшыя ўзнагароды. У конкурсе на лепшае ўладкаванне і ўтрыманне месцаў масавага адпачынку насельніцтва ў межах водаахоўных зон водных аб’ектаў не знайшлося роўных дзіцячаму санаторыю “Ружанскі”, што месціцца каля возера Паперня ў Пружанскім раёне. Першае месца ў намінацыі на лепшае падраздзяленне, якое ажыццяўляе гідраметэаралагічныя назіранні, дасталося групе гідралогіі з Пінска. Мацнейшай у спаборніцтвах на лепшы дзіцячы малюнак (узроставая група ад 3 да 5 гадоў) аказалася Соня Ісаенка, выхаванка дзіцячага садка №19 г. Брэста.
Акрамя таго, за вялікі ўклад у справу аховы навальнага асяроддзя нагрудным знакам “Ганаровы эколаг” узнагароджаны Іван Піліпцэвіч, начальнік Лунінецкай раённай інспекцыі прыродных рэсурсаў. Граматамі Мінпрыроды адзначана праца Віктара Каласоўскага, дырэктара КУВП “Водаканал” горада Баранавічы і калектыву абласнога эколага-біялагічнага цэнтра навучэнцаў. А яшчэ адзін прадстаўнік брэсцкай дэлегацыі – Віктар Гапанчук, намеснік галоўнага інжынера па метралогіі, ахове працы і экалогіі СП ААТ “Брэстгазаапарат” – атрымаў падзяку ад міністра прыродных рэсурсаў.
Спадзяёмся, прыемныя здабыткі на прафесійнай ніве стануць для эколагаў і датычных да гэтай справы яшчэ большым стымулам, каб далей працаваць у важным кірунку для захавання экалагічнай бяспекі. Жыццё працягваецца, а таму –
працягваюцца і клопаты аб наваколлі. Хочацца верыць, што яны зноў прынясуць свае вынікі і дапамогуць берасцейцам у чарговы раз падняцца на п’едэстал наступнага экалагічнага форуму. Але гэта будзе толькі праз год…

Тамара ВАСІЛЬКОВА, “НТ”.