Беларусь

Адпачынак… на шкоду прыродзе


Ці вырашаць праблему веснавыя суботнікі?
Сышоў снег. Агалілася зямля. Там, дзе бываў чалавек, балюча на яе глядзець – паўсюдна шматлікае смецце. Асабліва ў месцах адпачынку.
З начальнікам раённай інспекцыі прыродных рэсурсаў і аховы навакольнага асяроддзя Сяргеем Штыком праехалі ўздоўж ракі Мухавец. Бераг настолькі забруджаны, што не прайшлі 50 метраў – напакавалі мех смецця (пры любой паездцы начальнік інспекцыі не любіць дарма губляць час).
– Злавіць за руку парушальніка вельмі цяжка, – тлумачыць ён. – У інспекцыі нас двое, кантраляваць стан зон адпачынку кожны дзень не можам фізічна. Але з пачатку года ўжо аштрафавалі восем грамадзян. Дарэчы, накладваць адміністрацыйны штраф на тых, хто вывозіць смецце ў недазволеныя месцы, маюць права спецыялісты санітарнай службы раёна і прадстаўнікі жыллёва-камунальнай гаспадаркі. Аднак у іх функцыі ўваходзяць больш важныя мерапрыемствы і вытворчыя планы.
Галоўны санітарны ўрач раёна Уладзімір Лапус сітуацыю аналізуе так:
– Праводзім рэйды, растлумачальную работу сярод насельніцтва. Але гэтага недастаткова: культура адпачынку гараджан настолькі нізкая, што не паддаецца крытыцы. Застаецца адно – рупна працаваць камунальнікам.
Зрэшты, узгаданая прыбярэжная зона ўздоўж Мухаўца замацавана за саўгасам “Жабінкаўскі”. Іншыя прадпрыемствы і арганізацыі горада нясуць адказнасць за санітарны стан адпаведных тэрыторый. На паперы – так, а на справе…
– Таму ж саўгасу “Жабінкаўскі” – не да смецця, – разважае Сяргей Штык. – Дасылаць прадпісанне яму няма сэнсу, бо ў разгары палявыя работы.
Лясы, якія ўваходзяць у лясны фонд, абслугоўваюцца, у прыватнасці, Пятровіцкім лясніцтвам. Уздоўж аўтамабільных дарог за парадкам сочаць дарожнікі, пад высакавольтнымі лініямі – энергетыкі. А ў лясоў вакол вёсак гаспадара няма, бо былыя калгасныя лясы выведзены з-пад падпарадкавання сельвыканкамаў і нікому не перададзены. У сельскай мясцовасці найбольшы цяжар кладзецца на гарадскую жыллёва-камунальную гаспадарку, работнікі якой абслугоўваюць восем міні-палігонаў і згодна з распрацаваным графікам вывозяць смецце з вёсак. Не раз даводзілася чуць думку ад розных кантралюючых інстанцый: маўляў, няхай камунальнікі ў масавых месцах адпачынку паставяць кантэйнеры для смецця – і праблема будзе вырашана.
– На пляжах гэта абавязкова робім з надыходам купальнага сезона, – гаворыць дырэктар ЖКГ Аляксандр Будзько. – Навесці парадак на тэрыторыях, якія за намі замацаваны, просім найперш актывістаў БРСМ. Неяк паставілі два кантэйнеры каля хлеўчукоў пасёлка цукровага завода. Дык іх укралі. Колькі б кантэйнераў і дзе б ні ставіць, культура адпачывальнікаў наўрад ці палепшыцца. Хадзіць за прыкладамі далёка не трэба. Рэгулярна ў адзін і той жа час усе вуліцы горада абслугоўваюць пяць смеццявозаў. Але некаторыя гараджане такія “занятыя”, што пакуюць адходы ў вулічныя сметніцы або выстаўляюць тыя пакункі на тратуар, а іх да прыходу дворнікаў расцягваюць сабакі…
Яшчэ адна хвароба для горада – размалёўванне сцен. Бязглуздае графіці запаланіла дамы і агароджу. Калі супрацоўнікі міліцыі пакаралі аднаго “мастака”-падлетка, дык бацькі паднялі крык. Некаторыя дарослыя незадаволены тым, што іх дзяцей раз у год настаўнікі па просьбе таго ж начальніка раённай інспекцыі Сяргея Штыка выводзяць у прыгарадную зону збіраць смецце. Па санітарных нормах школьнікам без гумавых пальчатак гэтым займацца сапраўды нельга. Цікава, дзеці і дарослыя вельмі добра ведаюць свае правы. А абавязкі?..
Красавік у раёне аб’яўлены месяцам добраўпарадкавання. Райвыканкам прыняў рашэнне правесці суботнікі з мэтай навядзення парадку ў горадзе, населеных пунктах і вакол іх. Аднак ці вырашаць праблему суботнікі? На кароткі час – так. Наперадзе ж лета. Кампаніі зноў запалоняць улюбёныя куточкі адпачынку. Рыбакі заспяшаюцца таксама ў наседжаныя месцы. Але зноў жа мала хто будзе задумвацца пра тое, што ўлонне прыроды – зялёны храм, дзе паводзіць сябе трэба па-людску.
Аляксей ГАНЧУК, “НТ”,
г. Жабінка.

Адпачынак… на шкоду прыродзе
Оцените статью

Добавить комментарий

Авторизация
*
*
Генерация пароля