“Матылькі” і танцы

Асалоду ад заняткаў у танцавальным гуртку ў Лунінецкім цэнтры дзіцячай творчасці атрымліваюць і дзеці, і дарослыя
Напэўна, няма ў Лунінцы чалавека, які б не ведаў Святлану Галка. Гэтая прыгожая, абаяльная жанчына – кіраўнік танцавальнага гуртка ў гарадскім Цэнтры дзіцячай творчасці. Вось ужо каторы год выхаванцы Святланы Адамаўны прадстаўляюць Лунінец, а часам і ўвогуле Брэстчыну на шматлікіх конкурсах і турнірах. Нават міжнароднага значэння.

Да Святланы Адамаўны на заняткі прыходзяць дзеткі з пяці гадоў. Кіраўнік нікому не адмаўляе, у гурток прымае ўсіх жадаючых. І здараюцца цуды!
– Часам чую, як самі бацькі кажуць аб тым, што ў іх дзіцяці няма таленту да танцаў, – расказвае Святлана Адамаўна. – Становіцца крыўдна за іх сына ці дачку. Справа ў тым, што ў танцах таленту мала. Тут трэба працаваць. І не абысціся без сілы волі, старання, цярпення.
Выхаванцаў Святланы Адамаўны можна параўнаць з матылькамі. Лёгкія, спрытныя, прыгожа апранутыя. Адно задавальненне назіраць за імі. Нават на рэпетыцыі.
– Нашы зорачкі – Вераніка Ляпко і Святаслаў Чыжык, – знаёміць з юнымі танцорамі Святлана Адамаўна. – Гэта пара неаднаразова займала прызавыя месцы на разнастайных турнірах у сталіцы. Таксама цудоўна танцуюць Марына Лазіцкая і Ягор Гоман, Аня Дырда і Дзіма Рудовіч, Ангеліна Карульская і Кірыл Верас. Хочацца сказаць вялікі дзякуй бацькам гэтых дзяцей, якія заўжды цікавяцца іх поспехамі, дапамагаюць ім і падтрымліваюць у час спаборніцтваў.
Дарэчы, Святлана Адамаўна лічыць, што менавіта імкненне перамагчы робіць дзяцей сапраўднымі лідарамі.
– Не трэба вучыць дзяцей быць такімі, як усе, – кажа яна. – Наадварот, з малых гадоў кожны чалавек павінен ведаць, што ён індывідуальны!
На заняткі да Святланы Адамаўны ходзяць не толькі маленькія лунінчане, але і дзеткі з бліжэйшых да райцэнтра вёсак. Пра кіраўніка танцавальнага гуртка і яны, і іх бацькі кажуць толькі добрыя словы. А падчас выступленняў пад чароўныя гукі музыкі “матылькі” быццам ляцяць у танцы. Захапленне, якое прыносіць задавальненне, прыйшлося даспадобы дзясяткам школьнікаў.
Яна Ткачук, г. Лунінец.