Чаму жыхары дома №38/1 па вуліцы Куйбышава вымушаны жыць на будаўнічай пляцоўцы…

Жыхары скардзяцца на будаўнікоў, а тыя спасылаюцца на аб’ектыўныя прычыны
Капітальны рамонт – справа не аднаго дня. І цягнуць з ім не варта. Жыхары ж дома №38/1 па вуліцы Куйбышава ў абласным цэнтры сутыкнуліся з шэрагам праблем з-за непаваротлівасці будаўнікоў.
Капітальны рамонт гэтага аб’екта павінен быў скончыцца ў жніўні 2011 года. Аднак і на сённяшні дзень у некаторых кватэрах няма нават ацяпляльных батарэй. Віктар Зуй, інвалід II групы, які патэлефанаваў у рэдакцыю, паскардзіўся, што будаўнікі ўсё робяць несвоечасова.
– Вокны мне паставілі ў маі, ды на гэтым рамонт і скончыўся, – расказаў Віктар Васільевіч. – У кватэры няма батарэй, а наперадзе халады. Мне цяжка аднаму перасоўваць мэблю, а будаўнікі патрабуюць вызваляць месца. Толькі навошта? Кожны дзень яны прыходзяць, нешта замяраюць, але мала што робяць. Часта ўжо ў 15 гадзін будаўнікоў няма на месцы, хоць рабочы дзень у іх да 17.00. Мы заключалі дагаворы, але свае абавязкі выконваюць толькі жыхары. Пастаянны шум. Лічу, што ў такіх сітуацыях людзей трэба часова адсяляць. Аднак ніякіх прапаноў па гэтым пытанні не было…
Пракаменціраваў сітуацыю начальнік аддзела па капітальным рамонце КУП “ЖРЭУ г. Брэста” Аляксандр Смірноў:
– Праектна-каштарысная дакументацыя на гэты аб’ект не прадугледжвае адсялення жыхароў. Калі хто з іх жадаў зрабіць гэта па сваёй ініцыятыве, дык трэба было напісаць заяву ў ЖРЭУ. У нас ёсць спецыяльны жылы фонд: дом №105 па вуліцы Кірава і дзяржаўныя кватэры, якія часова не выкарыстоўваюцца – туды можна было б пераехаць.
Несвоечасовы пачатак будаўніцтва звязаны з тым, што Дзяржбуднагляд не атрымаў у тэрмін будаўнічую пляцоўку. Не змаглі адразу дамовіцца з уласнікам дома №38 аб устанаўленні на яго тэрыторыі часовай агароджы. Таму тэрмін здачы аб’екта быў перанесены на снежань 2011-га. Наконт цяпла ў кватэрах няхай не хвалююцца – бу-дзе ў тэрмін. Ёсць, праўда, пэўныя праблемы з фінансаваннем: пры каштарысе 844 мільёны рублёў мы ўжо затрацілі 946,6 мільёна. Капрамонт дома ажыццяўляецца за кошт яго жыхароў (1-3 паверхі) і за кошт дольшчыкаў (будуецца 4-ы паверх). Патрабуецца замена ўсёй электраправодкі, цеплавы вузел будзе вынесены асобна, перакладваем цалкам водазабеспячэнне. Пасля заканчэння ўсіх работ будзе праведзена абнаўленне кватэр за кошт сродкаў капрамонту.
А вось што сказаў майстар Міхаіл Каспярук:
– Не мы вінаваты, што Дзяржбуднагляд не выдаў дазвол на будаўніцтва ў жніўні мінулага года. Пачалі рамонт адразу, як атрымалі дакумент. Калі спатрэбіцца, будзем працаваць і ў выхадныя дні. Ёсць праблемы з пастаўкай будаўнічых матэрыялаў, але ўсё будзе зроблена своечасова: неабходнае абсталяванне чакае сваёй чаргі на ўстаноўку. На жаль, бясшумна рамантаваць не атрымліваецца…
Балючай тэмай гэтага рамонту стала адсяленне жыхароў. Але са слоў Алены Капацкевіч, інжынера вытворча-тэхнічнага аддзела абласной Інспекцыі дзяржбуднагляду, і Таццяны Корчык, намесніка галоўнага ўрача Брэсцкага абласнога цэнтра гігіены, эпідэміялогіі і грамадскага здароўя, стала зразумела: гэта пытанне вырашаюць толькі ў ЖРЭУ.  А там лічаць, што жыць можна і на… будаўнічай пляцоўцы.
А сапраўды, ці можна?
Дзмітрый ШЫФЯРШТЭЙН,
студэнт
БрДУ імя А.С. Пушкіна.