Беларусь

Старшыня аблвыканкама Канстанцін Сумар правёў чарговую прэс-канферэнцыю


Традыцыйнае мерапрыемства доўжылася больш за дзве гадзіны. Цікаўнасць прэсы была задаволена поўнасцю: больш чым на 30 пытанняў адказаў Канстанцін Андрэевіч.
Размова атрымалася шматтэмнай. У старшыні аблвыканкама пыталіся пра рэалізацыю ў рэгіёне прэзідэнцкіх даручэнняў і эканоміку, развіццё прадпрымальніцтва і ўдасканаленне транспартнай інфраструктуры, сацыяльную падтрымку насельніцтва і жыллёвае будаўніцтва, работу з адоранымі дзецьмі і ўвядзенне ў строй спартыўных аб’ектаў… Прагучала пытанне і ад “НТ”: “З чым звязаны той факт, што па ўзроўні заработнай платы вобласць займае апошняе месца ў рэспубліцы?”
Канстанцін Андрэевіч сказаў:
– Трэба глядзець на структуру эканомікі. Яна не дазваляе нам мець такую ж заработную плату, якая ёсць, напрыклад, у Мінска, Гомеля, Магілёва. Брэстчына – аграрная вобласць. Тут у прамысловасці працуе 25 працэнтаў, а па рэспубліцы – 28, на Гомельшчыне і таго больш. Таму і зарплаты там іншыя. Але гэта не значыць, што мы не дапрацоўваем ці заробкі людзям зніжаем. Калі параўнаць асобныя галіны, дык зусім іншая статыстыка будзе. Так, у АПК мы не саступаем аграрыям Гро-
дзеншчыны. І ў дадатак давайце паглядзім бюджэт. У Гомельскай вобласці 70 працэнтаў яго фарміруюць пяць прамысловых гігантаў – там і зарплата вышэйшая. У нас прадпрыемстваў кшталту “Брэстгазаапарат”, якія лічацца буйнымі падаткаплацельшчыкамі, нямнога. Але мы трымаем тэмп росту і бюджэт, таму і зарплата будзе павялічвацца.
Адказваючы ўжо на іншае пытанне ад другога выдання Канстанцін Андрэевіч заўважыў:
– Занадта шмат мы сумняваемся. Не сумнявацца трэба, а старацца нешта зрабіць самім.
І ўжо ў канцы сустрэчы параіў:
– Вучыцеся самастойнаму мысленню. Трэба падаваць аўдыторыі матэрыял рэальны, а не надуманы. Да канструктыўнай крытыкі ўлада заўсёды прыслухаецца.
А нам варта прыслухацца да той аб’ектыўнай інфармацыі, якую, адказваючы на розныя пытанні, журналістам паведаміў кіраўнік вобласці.
ПРА БУДАЎНІЧЫЯ ПЛЯЦОЎКІ
“Ільготнае жыллёвае будаўніцтва захаваецца, але не ў ранейшых аб’ёмах. На льготнае крэдытаванне могуць разлічваць шматдзетныя і маладыя сем’і, людзі, якія пражылі 10 год і больш у інтэрнаце і не маюць іншага жылля. Зменіцца працэнт крэдытавання: трохі “падрасце”. Будуць змяненні і па субсідыях, каб імі можна было карыстацца і пасля здачы дома (раней субсідзіраванне вялося, пакуль дом будавалі, не паспеў яго атрымаць – права страчвалася)”.
“Даручэнні Кіраўніка дзяржавы па Баранавічах будзем выконваць. Сёлета ўжо выдаткавана больш чым 27 мільярдаў рублёў на распрацоўку будаўнічай дакументацыі і добраўпарадкаванне, больш чым 3 мільярды выкарысталі на развіццё інжынерна-транспартнай інфраструктуры, каля 22 мільярдаў – на капітальны рамонт жылога фонду. Зараз у горадзе вядуцца работы на 45 аб’ектах, а за пяцігодку ў Баранавічы будзе ўкладзена 220 мільярдаў рублёў… Горад заслугоўвае новага Дома культуры. Прафінансавана распрацоўка праектна-каштарыснай дакументацыі. Будзем у наступным годзе пачынаць будоўлю”.
“У верасні завяршыцца першы этап рэканструкцыі чыгуначнага вакзала ў Брэсце – Маскоўскага боку. Адразу пачынаем другі – рэканструкцыю Варшаўскага боку. Трэці і чацвёрты этапы давяршаць справу. Да 2015 года рэканструкцыю выканаем”.
“Планавалі ў Бярозе Дом культуры і гасцініцу. Народ сумняваецца, што планы рэалізуем? Няхай бы правялі 3-4 суботнікі, пачалі будаваць, а там і вобласць бы дапамагла. У будучым годзе зоймемся Домам культуры. Нам жа давялося сёлета не толькі Бярозу да абласных “Дажынак” рыхтаваць, але і Ганцавічы да Дня беларускага пісьменства, куды ні многа ні мала, а 50 мільярдаў далі”.
“У Іванаве лепш пакуль ад планаў наконт спартыўнага комплексу адмовіцца, трэба будаваць дзіцячы садок. Плануем яго на 2012 год, а яшчэ ў плане – дашкольныя ўстановы ў Баранавічах, Пінску, у брэсцкім мікрараёне Паўднёвы Захад-4”.
“Пачалі будаваць фізкультурна-аздараўленчы комплекс з басейнам у Століне. Па плане ўвод – у 2013-м, але пастараемся максімальна адпрацаваць на аб’екце ў наступным годзе. Скарачаем тэрміны – таннее аб’ект”.
ПРА САЦЫЯЛЬНЫЯ ГАРАНТЫІ
“Сацыяльны пакет інвестары абавязаны выконваць: 5 год профіль прадпрыемства новыя гаспадары змяніць не могуць. І чалавека, які нармальна працуе, звольніць не могуць. Цяпер, падпісваючы інвестпраекты, сачу, каб у іх прадугледжвалася стварэнне новых рабочых месцаў, каб пры ўсіх рэканструкцыях і новых тэхналогіях колькасць працуючых не змяншалася. Вызвалілася на ранейшым месцы працоўная адзінка – чалавек пераводзіцца на новае створанае рабочае месца. Людзі павінны быць працаўладкаваны”.
“Цэны на агародніну сваёй вытворчасці будзем кантраляваць, каб наша прадукцыя была даступная для насельніцтва. Гандлёвая нацэнка – 10-15 працэнтаў, не больш. Трэба выводзіць цэны з мінусавай рэнтабельнасці і больш вырошчваць свайго. Няхай будуць сабе і дарагія заморскія бананы, але тут жа павінны быць і нашы яблыкі, і прыкметна таннейшыя”.
“Садзім бульбу, а потым думаем, куды ж мы яе будзем прадаваць. Трэба пазбаўляцца ад такога стэрэатыпу. Сур’ёзную работу павінны праводзіць нарыхтоўчыя канторы. Яны ведаюць рынак, маюць сувязі ў Расіі, ва Украіне. Каб стымуляваць работу, давялі планы па экспарце бульбы. А для сябе ставім задачу – забяспечыць максімальнае захоўванне “другога хлеба”. Сёлета павінны пабудаваць 40 бульбасховішчаў. Апошні транш на гэтыя мэты далі ў 40 мільярдаў рублёў. Зможам размясціць на захоўванне 140 тысяч тон бульбы. Астатнюю – на рэалізацыю насельніцтву, у тым ліку і на восеньскіх кірмашах без нацэнак, здачу для спіртавой прамысловасці і іншае”.
ПРА ЭКАНАМІЧНЫЯ ПЕРСПЕКТЫВЫ
“За апошнія 5 год колькасць малых прадпрыемстваў у вобласці вырасла ў чатыры разы, а занятых у сферы прадпрымальніцтва людзей стала болей у 1,5 раза. У рэспубліцы па колькасці індывідуальных прадпрымальнікаў мы –
на першым месцы. У нас у малым і сярэднім бізнесе занята больш за 130 тысяч чалавек. Іх уклад у бюджэт – кожны чацвёрты рубель. Для далейшай падтрымкі прыватнай ініцыятывы прадугледжваем немалыя сродкі. Ільготы для развіцця бізнесу не адмяняюцца. Напрыклад, у малых гарадах зніжэнне падатковай нагрузкі – 50 працэнтаў. Было б жаданне развівацца плюс ініцыятыва”.
“Перспектывы ў брэсцкага аэрапорта ёсць. Асабліва ў плане пашырэння грузаперавозак. Шукаем інвестара, зацікаўленага ў стварэнні лагістычнага цэнтра. У нас ёсць, чым гандляваць. Зацікаўлена пытанне вывучаюць італьянцы. Маем прапанову ад Катара”.
“Гарадская гаспадарка – гэта складаная гаспадарка. У Брэсце для таго, каб наладзіць работу па маршрутных транспартных перавозках, па маёй просьбе гарвыканкам з праектным інстытутам адпрацавалі схему руху пасажырскага транспарту з улікам работы прадпрыемстваў, арганізацый, устаноў. Прымаючы ў разлік гэта, і будзем весці аптымізацыю маршрутаў.
ПРА КУЛЬТУРУ І ТАЛЕНТЫ
“Культура ніколі не была рэнтабельнай, але цяпер стаіць задача эфектыўнасці работы яе ўстаноў. У вобласці 510 дамоў культуры, 666 бібліятэк. Ці разумна мець у адным месцы па тры бібліятэкі? А СДК у маланаселеным сельскім пункце, дзе асноўныя жыхары – пенсіянеры? Трэба аптымізаваць структуру культустаноў, але без культуры людзей не пакінем. Можна той жа бібліобус накіраваць ці выязны клуб. Вопыт такой работы ў вобласці ёсць”.
“Стварыць спецыяльны абласны фонд па падтрымцы адораных дзяцей і моладзі? Падумаем над гэтым. Але ж і цяпер падтрымліваем. Аблвыканкам устанавіў свае стыпендыі лепшым студэнтам ВНУ Берасцейшчыны. З 2006 года ўручаем прэміі педагогам і таленавітым вучням – іх ужо атрымалі 71 навучэнец і 64 настаўнікі. І творчыя фестывалі фінансуем – гэта ж таксама падтрымка. Здольнымі людзьмі трэба даражыць”.
Святлана ТАБОЛІЧ, “НТ”.

Старшыня аблвыканкама Канстанцін Сумар правёў чарговую прэс-канферэнцыю
Оцените статью

Добавить комментарий

Авторизация
*
*
Генерация пароля