Беларусь

Інтэрнат ці кватэра, або Дзе камфортней і зручней жыць сучасным студэнтам?


Новы навучальны год у БрДУ імя А.С. Пушкіна пачаўся з урачыстага адкрыцця другой чаргі ўніверсітэцкага інтэрната №4 па вуліцы Пушкінскай. 352 студэнты размясціліся ў камфартабельных жылых блоках свайго “другога дома”.
Рэктар універсітэта Мечыслаў Часноўскi адзначыў, што ў гэтым годзе БрДУ імя А.С. Пушкіна зможа задаволіць патрэбы студэнтаў у iнтэрнаце больш чым на 70 працэнтаў. Цудоўна, бо, вядома ж, у студэнтаў жыллёвае пытанне заўсёды стаіць рубам.
Звычайна ў іх ёсць два варыянты выбару жылля: універсітэцкi інтэрнат або здымная кватэра. На жаль,  далёка не ва ўсіх атрымліваецца засяліцца ў інтэрнат.
Ды і не кожнаму даспадобы жыць вялікай інтэрнацкай сям’ёй. “Мінусаў” пражывання ў інтэрнаце даволі шмат, адзін з іх – менш так званай “асабістай прасторы”. Акрамя таго, давя-дзецца дзяліць з кімсьці пакой ці санвузел – значыць, практычна не будзе магчымасці адасобіцца і пабыць у цішыні. Другая праблема, з якой сутыкаюцца студэнты, гэта абмежаванасць тэрытарыяльнай прасторы. У большасці ўніверсітэтаў пакоi ў інтэрнатах вельмі маленькія, таму магчымасць мець шмат рэчаў практычна адсутнічае. Верагодны і  негатыўны ўплыў на вучобу з-за пастаянных вясёлых і гучных кампаній побач. З-за гэтага сярэдні бал можа рэзка папаўзці ўніз, а тут і да высялення недалёка…
Яшчэ адна нязручнасць інтэрнацкіх будняў – падпарадкаванне правілам. У кожнага інтэрната ёсць свой статут, і жыльцы абавязаны яго прытрымлівацца, інакш непаслухмяных могуць выселіць. Безумоўна, асноўны закон любога інтэрната – гэта каменданцкая гадзіна, якой рэгулюецца знахо-джанне студэнтаў па-за будынкам. А маладым заўсёды хочацца пагуляць даўжэй.
Тыя ж, каму даспадобы свабода ці ў каго засяліцца ў інтэрнат па пэўных прычынах не атрымалася, выбіраюць здымнае жыллё. Але і тут узнікаюць праблемы. У першую чаргу – гэта кошт. У сярэднім у аднапакаёвай кватэры ён  вагаецца ад 50 да 100 $ (бывае вышэй), аднак гэта ўжо варыянт “люкс”. Пагадзіцеся, не ў кожнага студэнта ёсць магчымасць аддаваць такія грошы кожны месяц, а на падтрымку бацькоў не ўсе могуць разлічваць. Вызначыўшыся з коштам, студэнт звяртае ўвагу на наступныя характарыстыкі: умовы пражывання, размяшчэнне кватэры паблізу ўніверсітэта, бо праезд сёння таксама каштуе дорага.
А што на гэты конт мяркуюць сучасныя студэнты? Давайце пагаворым пра тое, што неабходна юнакам і дзяўчатам для таго, каб не адчуваць нязручнасцей у быце, якія, вядома ж, уплываюць на вучобу.  Рамантыка студэнцкіх інтэрнатаў ці бонусы асобнага пражывання ў кватэры? Што скажаце, равеснікі? Запрашаем да дыялогу! Пішыце, тэлефануйце.
Маргарыта СЯРГЕЕВА,
Марыя ПРАКАПЮК,
студэнткi
БрДУ імя А.С. Пушкіна.

Інтэрнат ці кватэра, або Дзе камфортней і зручней жыць сучасным студэнтам?
Оцените статью

Добавить комментарий

Авторизация
*
*
Генерация пароля