Прэм’ера рубрыкі: Медыцына раённага маштабу

Неаспрэчны абавязак доктара Пашкевіча
З  галоўным урачом Столінскай цэнтральнай раённай бальніцы, дэпутатам абласнога Савета дэпутатаў 26-га склікання Пятром Пашкевічам папярэдне дамовіліся сустрэцца ў першай палове дня. У дзень прыезду ў райцэнтр Пётр Аркадзьевіч пацвердзіў дамоўленасць, таму наш журналісцкі “дэсант” і рушыў у ЦРБ.
Пераступаем парог прыёмнай галоўнага ўрача, тлумачым, хто мы такія. Сакратар “агарошвае”: “А Пятра Аркадзьевіча няма”. Здзівіцца “неабавязковасці” галоўнага не паспяваем, бо гаспадыня прыёмнай дадае: “Ён на тэрміновай аперацыі”. Практыкуючы хірург Пашкевіч вымушаны быў парушыць дадзенае раней слова, бо ў небяспецы аказалася жыццё пацыента. Пятру Аркадзьевічу нават не давялося рабіць выбар, таму што для яго абавязак урача – найважнейшы і неаспрэчны.
Пазней, калі сустрэліся напрыканцы працоўнага дня, даведалася, што Пашкевіч – тутэйшы, родам са Століншчыны. У раённы цэнтр прыехаў у 1985 годзе пасля заканчэння медыцынскага інстытута, а бальніцу ўзначаліў у 2007-м. Між іншым, у дзяцінстве Пеця Пашкевіч марыў вадзіць цеплавозы (“Уся радня на чыгунцы працавала”), але ў 8 класе сябар незнарок зламаў яму руку. Вось тады і наглядзеўся на доктарскую справу, лічы – “захварэў” медыцынай. Прыкіпеў так, што не ўяўляе сабе іншага жыцця: ”Тут кожны дзень – праверка твайго прафесіяналізму, адначасова – стымул прафесійнага росту. Ды і перад землякамі марку трымаць трэба”. Так, да свайго могуць паставіцца спагадліва, але гультайства, некампетэнтнасці, а тым больш абыякавасці ніколі не даруюць.
Можа, таму, што працуе Пётр Пашкевіч на малой радзіме, асаблівае ў яго стаўленне да развіцця тут аховы здароўя, умацавання медыцынскай службы.
– За апошні час лячэбныя ўстановы раёна зрабілі істотны крок наперад у сваім развіцці, – расказвае Пётр Аркадзьевіч. – Спрыяла гэтаму як увогуле дзяржаўная палітыка, так і адносіны да галіны абласнога Савета дэпутатаў, абласнога выканаўчага камітэта. У дэпутацкім корпусе вобласці на мінулых выбарах у мясцовыя Саветы былі абраны некалькі прадстаўнікоў медыцыны. Нам з калегамі ўдалося данесці да кіраўніцтва заклапочанасць лю-дзей на месцах узроўнем развіцця медыцынскай дапамогі. Дэпутаты падтрымалі многія прапановы, а таму фінансаванне для развіцця сістэмы аховы здароўя выдзялялася максімальна магчымае. І перамены не прымусілі сябе чакаць, у тым ліку і на Століншчыне.
Летась у раённай бальніцы рэканструявалі аддзяленне пералівання крыві і харчовы блок. У 2012 годзе сход грамадзян раёна прыняў рашэнне ўмацаваць матэрыяльную базу медыцыны ў Давыд-Гарадку. Давялі ўжо да ладу дарослую і дзіцячую паліклінікі, жаночую кансультацыю – каля 8 мільярдаў рублёў выдаткавалі з раённага бюджэту. У мінулым годзе 4 мільярды патрацілі на лабараторыю. Завяршаюцца работы ў стаматалагічнай паліклініцы. У планах 2014-га для Давыд-Гарадоцкага філіяла – рэнтгенкабінет, фінансаванне якога складзе каля мільярда рублёў.
Дзякуючы сродкам Дзяржаўнай праграмы адраджэння сяла, адноўлены ФАПы ў Вялікім Малешаве, Рамелі, Дубаі, Відзіборы, Кароцічах. Былую кантору мясцовага СВК у вёсцы Вялікія Арлы перарабілі пад урачэбную амбулаторыю, а каб замацаваць там урача, летась за сродкі раённага бюджэту купілі для док-тара ў вёсцы дом. Увогуле, на Століншчыне актыўна практыкуюць мэтавае накіраванне на вучобу ў медыцынскія ВНУ. “У нашых школах дзяцей добра вучаць, паступаюць у медуніверсітэты выпускнікі паспяхова, а потым вяртаюцца дадому і ахвотна працуюць”, – кажа Пётр Аркадзьевіч.
Раённая медыцына дае магчымасці для прафесійнай самарэалізацыі, бо галоўны ўрач падтрымлівае прагрэсіўнае, заахвочвае калег практыкаваць сучасныя методыкі лячэння, новыя медыцынскія тэхналогіі. Яшчэ ў 2004 годзе ў Столінскай ЦРБ першай у вобласці сярод бальніц раённага ўзроўню пачалі рабіць эндавідэахірургічныя аперацыі. Тры гады таму ўрач-траўматолаг Сяргей Кісель стаў практыкаваць аднаполюснае пратэзіраванне тазабедранага сустава. А паўтара года таму Сяргей Іванавіч пачаў выконваць яшчэ адну прагрэсіўную аперацыю – астэасінтэз пры пераломах касцей галёнкі з блакіроўкай. З 2011-га ў Століне асвоілі методыку вызначэння прастатаспецыфічнага антыгена, што дапамагае ў дыягностыцы анкалагічных хвароб. Чацвёрты год у райцэнтры працуе аддзяленне гемадыялізу…
– З апошніх набыткаў – гістараскоп для абследавання жанчын. Сёлета плануем укараніць методыку мамаграфіі для дыягностыкі хвароб малочнай залозы, а таксама колькаснае вызначэнне маркераў некрозу міякарда – для кантролю лячэння інфаркту міякарда, – расказвае Пётр Пашкевіч. – Відавочна, што прагрэсіўныя тэхналогіі дыягностыкі і лячэння прымяняюць і нашы ўрачы, а гэта набліжае сучасную медыцынскую дапамогу да насельніцтва.
У ліку задач, на якія варта ў бліжэйшы час звярнуць увагу і медыкам, і дэпутатам, Пётр Аркадзьевіч называе дзейнасць бальніц сястрынскага догляду, пашырэнне спектра платных паслуг і іх экспарту.
Так, сёння медыцына інтэнсіўна развіваецца, і, каб не апынуцца на яе задворках, трэба самаўдасканальвацца пастаянна, грунтоўна падыходзячы як да бягучых, так і да перспектыўных планаў развіцця сістэмы аховы здароўя. Галоўны ўрач Столінскага раёна Пётр Пашкевіч і яго калегі гэта добра разумеюць, таму і працуюць самааддана ўжо сёння, каб заўтра мець перспектыву.
Святлана ТАБОЛІЧ, “НТ”,
Столінскі раён.