17 снежня амаль стагоддзе таму на свет з’явіўся айчынны кінематограф

Якраз у гэты дзень у далёкім 1924-м сваю дзейнасць пачало дзяржаўнае ўпраўленне па справах кінематаграфіі і фатаграфіі “Белдзяржкіно”. З моманту яго нараджэння прынята весці адлік гісторыі нацыянальнага сінематографа.
У некаторых з нас паняцце “айчыннае кіно” ўвогуле не выклікае эмоцый, у той час як іншыя ахвотна пералічваюць любімыя стужкі, створаныя на радзіме. Карацей кажучы, калі пабудаваць асацыятыўны рад з ежай, дык для кагосьці гэта сапраўдны дэсерт, а для некага – нішчымная страва. Па праўдзе, у нацыянальным кінематографе хапае і першага, і апошняга, але напярэдадні свята прынята згадваць толькі станоўчае пра “імянінніка”.
Наконт прыярытэтаў у нацыянальным кіно ахвотна выказалася Тамара Кажушка, дырэктар кінатэатра “Мір” у абласным цэнтры. Дарэчы, “Мір” даўно набыў папулярнасць як кінатэатр сямейнага тыпу, а таму зусім не дзіўна, што сярод любімых у Тамары Іванаўны фільм, які цалкам адпавядае лепшым традыцыям сямейнага прагляду, – “Рыжык у Залюстэр’і” Алены Туравай.
– Яркая, маляўнічая стужка хоць і арыентавана пераважна на юнага гледача, але не пакідае абыякавымі і дарослых кінаманаў, – дзеліцца Тамара Кажушка. – Якраз той рэдкі выпадак, калі сімпатыі дзяцей і іх бацькоў абсалютна супадаюць. Выдатныя акцёрскія работы, добрыя спецэфекты вылучаюць гэты фільм з ліку аналагічнай прадукцыі. Да таго ж, гэта першы айчынны прадукт з выкарыстаннем камп’ютарнай графікі, што для студыі “Беларусьфільм” увогуле нетыпова. З ліку “дарослага” кіно немагчыма не адзначыць пранізлівую драму “Ваўкі”, знятую Аляксандрам Колбышавым па матывах аднайменнай аповесці свайго калегі Аляксандра Чакмянёва.
Апошнюю карціну кіналюбы горада над Бугам павінны добра памятаць: літаральна тры гады таму выдатная работа Аляксандра Колбышава атрымала Гран-пры Рэспубліканскага фестывалю беларускіх фільмаў у Брэсце.
Дарэчы, дзень нараджэння айчыннага сінематографа ў вобласці не пройдзе незаўважаным і адзначыцца шэрагам цікавых кінапраглядаў.
– З 14 па 20 снежня кінавідэасетка вобласці правядзе Тыдзень беларускага кіно, у межах якога будуць трансліравацца апошнія работы студыі “Беларусьфільм”, – расказвае Вячаслаў Шахлевіч, генеральны дырэктар КУП “Брэстаблкінавідэапракат”. –  Гледачы ўбачаць стужкі, якія даўно палюбіліся прыхільнікам нацыянальнага кіно: “На спіне ў чорнага ката”, “Ваўкі”, “На ростанях”, “Украсці Бельмандо”, “Сляды апосталаў”. Для самых маленькіх кіналюбаў падрыхтавана індывідуальная праграма: ім пакажуць “Прыгоды Несцеркі” і “Рыжык у Залюстэр’і”. У наступным годзе з нецярпеннем чакаем выхаду ў пракат новага фільма Алены Туравай – “Кіндэрвілейскі прывід” па матывах навелы Оскара Уайльда і шчыра спадзяёмся, што сустрэчы з новымі героямі будуць яркімі і запамінальнымі.
Дарэчы, на маніторах, усталяваных у фае кінатэатра “Мір”, фактычна ў рэжыме нон-стоп будзе дэманстравацца кароткаметражка “Час патрыётаў”, якая пазнаёміць наведвальнікаў з гісторыяй айчыннага кіно і цікавымі асобамі ў ім.
Калі гаварыць пра бліжэйшую будучыню – у ёй таксама знойдзецца месца для новых праектаў патрыётаў нацыянальнага кінематографа. Так, у надыходзячым 2014-м абласны кінавідэапракат абавязкова набудзе некалькі актуальных кінанавінак – напрыклад, узгаданага “Кіндэрвілейскага прывіда”, а яшчэ сумесны расійска-беларускі фільм “Роля” Канстанціна Лапушанскага, які зараз даволі паспяхова ўдзельнічае ў разнастайных кінафестывалях.
Ніна ЛЕАНАВЕЦ, “НТ”.