Беларусь

29 студзеня прайшла калегія ўпраўлення адукацыі аблвыканкама


З праблем і набыткаў дашкольнай адукацыі пачаў  справаздачны даклад начальнік упраўлення адукацыі аблвыканкама Міхаіл Ціханчук. Як заўважыў Міхаіл Андрэевіч, у апошнія гады назіраецца тэндэнцыя “амала-джэння” ясельных груп: 8700 дзяцей ва ўзросце ад года да двух наведваюць дашкольныя ўстановы. У мінулым годзе колькасць месцаў у іх павялічылася на 930, але пытанне яшчэ чакае свайго канчатковага вырашэння (напрыклад, у Маскоўскім раёне горада Брэста дашкольныя ўстановы могуць наведваць толькі 82,1 працэнта дзяцей).
Без збояў працуе ў вобласці сістэма агульнай сярэдняй адукацыі. Ужо трэці год запар расце колькасць першакласнікаў (летась іх было 16131, а годам раней – толькі 14907). Працягваецца камп’ютарызацыя школьных бібліятэк – на цяперашні час гэта 89,5 працэнта. І ў той жа час камп’ютарная аснашчанасць не можа вырашыць праблем якасці навучання. Усім нам хацелася б, каб у вобласці было больш “зорак”. Праўда, колькасць вучняў, якія набралі на цэнтралізаваным тэсціраванні па асобных прадметах 100 балаў, павялічылася летась удвая (37 чалавек), але ж на заключным этапе прадметных алімпіяд брастаўчане атрымалі ўсяго 56 дыпломаў, у той час як, напрыклад,  у гродзенцаў іх – 98.
Дыскусію ў зале выклікала пытанне аб профільным навучанні. Падводзячы яе вынікі, намеснік старшыні аблвыканкама Леанід Цупрык зазначыў, што профільная адукацыя павінна быць накіравана на вырашэнне кадравых праблем у канкрэтным рэгіёне і яе трэба спалучаць з актыўнай прафарыентацыяй. На думку Леаніда Аляксан-дравіча, неабходна і надалей падымаць прэстыж рабочых прафесій.
Прыемна ўсведамляць, што ў Брэсцкай вобласці самая нізкая дзіцячая злачыннасць па рэспубліцы. У той жа час  работнікаў адукацыі хвалююць сацыяльна праблемныя сем’і. “Каб не дапусціць бяды, – перакананы Леанід Цупрык, –  неабходна адразу даць гора-бацькам зразумець, што пастаноўка сям’і на ўлік як сацыяльна небяспечнай – гэта не простая фармальнасць: наперадзе чакае суд, калі яны не возьмуцца за розум”.
На парадку дня калегіі было таксама абмеркаванне пытанняў спецыяльнай адукацыі, абароны жыцця дзяцей, праблем матэрыяльна-тэхнічнага забеспячэння школ, спорту і турызму. Прадметная размова вялася пра выпадкі парушэння працоўнага заканадаўства ва ўстановах адукацыі, кадравую палітыку, працу са зваротамі грамадзян…
Па выніках працы за год шэрагу педагогаў вобласці ўручаны ганаровыя граматы ўпраўлення адукацыі, а намеснік кіраўніка аддзела адукацыі, спорту і турызму Пінскага гарвыканкама Людміла Былінская ўзнагароджана нагрудным знакам “Выдатнік адукацыі”.
Мікола СЯНКЕВІЧ, “НТ”.

29 студзеня прайшла калегія ўпраўлення адукацыі аблвыканкама
Оцените статью

Добавить комментарий

Авторизация
*
*
Генерация пароля