Беларусь

Як нас абслугоўваюць: снежаньскі сюрпрыз


Разбурыць, ліквідаваць або закрыць заўсёды лягчэй, чым захаваць
Паведамленне пра тое, што рэйсавы аўтобус Маларыта – Перавысь, які хадзіў па суботах з часам адпраўлення з райцэнтра ў 10.10 (а ў 10.00 з Брэста прыходзіць дызель-цягнік), з 1 снежня адменены, было нібы снег на галаву не толькі для мяне. Знянацку яно застала і студэнтаў, і іншых маіх землякоў, якія жывуць у Маларыце і абласным цэнтры, а ў выхадныя ездзяць у Арэхава, Зеляніцу, Перавысь, яшчэ (па шляху руху аўтобуса) у Олтуш і Дворышча, каб праведаць састарэлых бацькоў. У тую злашчасную суботу, 1 снежня, каб не вяртацца назад, многія дабіраліся да пункта прызначэння на перакладных. Зусім як у далёкія ўжо 70-ыя гады мінулага стагоддзя: да павароту на Арэхава – на аўтобусе Маларыта – Ацяты, а там – як пашанцуе…
Абурэнню людзей, якія з-за адсутнасці звыклага рэйса павінны былі ехаць аўтобусам Маларыта – Ацяты, не было мяжы. Чаго толькі не давялося пачуць у адрас начальнікаў, якія не дбаюць пра народ, бо самі грамадскім транспартам ніколі не карыстаюцца – у кожнага службовы аўтамабіль, а ад знаёмых – і ў свой таксама. Маўляў, ты ж “чацвёртая ўлада”, чаму маўчыш? Я паабяцала высветліць, чаму адмянілі аўтобус і што будзе далей.
Наведаўшыся 3 снежня на аўтавакзал, даведалася, што, акрамя вышэйназванага маршрута, адменены яшчэ каля пяці: на Полікі, Ляхаўцы… А вось на Хаціслаў, куды рэгулярна дызель-цягнік ходзіць, згодна з раскладам руху грамадскага транспарту аўтобус накіроўваецца аж 5 разоў на тыдзень. У паведамленні аб адмене рэйсаў быў указаны нумар тэлефона аўтобуснага парка №1 г. Брэста (42-36-01), па якім можна было атрымаць усе даведкі.
Не адкладваючы справу на доўгі час, званю. У аддзеле транспартных перавозак прыемны жаночы голас наконт адмены аўтобуса на Перавысь паведаміў, што маршрут гэты стратны, а мясцовая ўлада не хоча даплачваць. І ўвогуле, па ўсіх пытаннях параіла звяртацца ў Маларыцкі райвыканкам.
Намеснік старшыні райвыканкама Віктар Сарока патлумачыў, што ў бюджэце не хапае 100 мільёнаў рублёў, каб разлічыцца з аўтапаркам – і яго кіраўніцтва закрыла частку маршрутаў, у тым ліку  Маларыта – Перавысь. Але  мера гэта часовая. Зараз, па словах Віктара Раманавіча, фарміруецца бюджэт на наступны год, і з 1 студзеня рух па гэтых кірунках будзе адноўлены. А пакуль ён параіў скарыстацца маршруткамі.
Карыстаемся! Ды толькі маршрутка разлічана на 14 пасажыраў, а ў выхадныя іх удвая больш і ўсе імкнуцца трапіць у вёску. І хоць часам кажуць, што ў цеснаце, але не ў крыўдзе – дазвольце не згадзіцца. Адны, заплаціўшы вадзіцелю 9,5 тысячы рублёў, едуць, як людзі, зручна седзячы, а другія – сагнуўшыся ў тры пагібелі, бо нізкі салон не дазваляе стаяць у поўны рост. Ды і рызыкоўна! Вось калі б хто-небудзь з кіраўнікоў раёна і аўтапарка хоць раз праехаў у перапоўненай маршрутцы ў выглядзе літары “Г” адлегласць у 20 кіламетраў – упэўнена: праблема руху аўтобусаў імгненна была б вырашана.
А што датычыцца стратнасці рэйсавага маршруту Маларыта – Перавысь, дык на гэтым аўтобусе ў вёску Арэхава па суботах ездзіла шмат гадоў і заўсёды ўсе сядзячыя месцы ў ім былі заняты. Здаралася, што некаму і стаяць даводзілася. Дык адкуль стратнасць? Ад танных білетаў? Тады прапануем зрабіць кошт такім, як у маршрутцы. Нам, пасажырам, усё роўна, каму плаціць – абы камфортна даехаць да вёскі. Інакш атрымліваецца, як у вядомай прымаўцы: паны б’юцца, а ў мужыкоў ілбы трашчаць. Няўжо кіраўніцтва раёна і аўтобуснага парка не могуць знайсці паразуменне?..
Надзея ЯЦУРА, “НТ”,
Маларыцкі раён.

Як нас абслугоўваюць: снежаньскі сюрпрыз
Оцените статью

Добавить комментарий

Авторизация
*
*
Генерация пароля