Нагляд краін Садружнасці

ДА НАЗІРАННЯ ЗА ХОДАМ ПРЭЗІДЭНЦКАЙ ВЫБАРЧАЙ КАМПАНІІ
ПРЫСТУПІЛА МІСІЯ НАЗІРАЛЬНІКАЎ АД СНД
Увага міжнароднай супольнасці да важнай палітычнай выбарчай кампаніі, якая зараз ідзе ў Беларусі, прагназавалася. Пацвярджэннем цікаўнасці з боку міжнародных арганізацый стаў пачатак работы місіі назіральнікаў ад СНД. За ходам падрыхтоўчага этапа сочаць 27 міжнародных назіральнікаў ад краін Садружнасці. Кіраўніком аддзялення штаба місіі ў Брэсцкай вобласці выбраны намеснік дырэктара Дэпартамента па супрацоўніцтве ў сферы бяспекі і супрацьдзеяння новым выклікам і пагрозам выканкама СНД Бахыт Дасанаў.
Тры дні спадар Дасанаў з калегамі знаёміўся з работай абласной выбарчай камісіі, а таксама дзейнасцю тэрытарыяльных Ленінскай, Маскоўскай, Жабінкаўскай і Кобрынскай раённых. Уражанні засталіся прыемныя, ацэнкі дадзены станоўчыя. На думку Бахыта Дасанава, наш рэгіён ужо сёння гатовы да правядзення выбараў: памяшканні абсталяваны сувяззю, у камісіях ёсць неабходныя дакументы, напрыклад, Выбарчы кодэкс Рэспублікі Беларусь. Назіральнікі адзначылі таксама кампетэнтнасць членаў выбаркамаў, з якімі гутарылі па тэме выбараў. Не застаўся без увагі і той факт, што ў тэрытарыяльных камісіях шырока прадстаўлены палітычныя партыі і грамадскія аб’яднанні, што пацвярджае захаванне дэмакратычных прынцыпаў і норм пры правядзенні прэзідэнцкіх выбараў.
Назіральнікі мелі магчымасць вывучыць і сітуацыю са зборам подпісаў у падтрымку прэтэндэнтаў на галоўную дзяржаўную пасаду. Бахыт Дасанаў адзначыў роўнасць умоў для розных ініцыятыўных груп і тое, што нідзе з боку мясцовых улад, праваахоўных органаў для гэтага не чынілася ніякіх перашкод.
Маніторынг выбараў будзе весціся на ўсіх этапах  прэзідэнцкай кампаніі. Ён бу-дзе грунтавацца на прынцыпах палітычнай нейтральнасці і непрадузятасці, неўмяшання ва ўнутраныя справы Беларусі. За тры дні да выбараў Кіраўніка дзяржавы ў рэспубліцы да работы прыступяць яшчэ каля 400 кароткачасовых назіральнікаў місіі СНД.
Святлана ТАБОЛІЧ, “НТ”.