Беларусь

Сёлета дзень ведаў і Дзень беларускага пісьменства адзначаюцца 1 верасня


Сімвалічнае супадзенне паказвае каляндар: сёлета дзень ведаў і Дзень беларускага пісьменства адзначаюцца 1 верасня

Канцэпцыя рэспублі-канскага свята, якое прымяркоўваецца да Дня беларускага пісьменства, прадугледжвае паказ непарушнага адзінства друкаванага слова з гісторыяй беларускага народа, яго цеснай сувязі са славянскімі крыніцамі, а таксама асэнсаванне гістарычнага шляху пісьменства і друку. Менавіта гэта даюць нам веды, спасціжэннем якіх чалавек займаецца ўсё сваё жыццё. І каб насамрэч пранікнуцца духам матчынага слова, дакрануцца да сівой даўніны роднага краю, трэба з малых год пасябраваць з кнігай.
Нават у час летніх канікулаў шматлюдна ў Камянецкай раённай дзіцячай бібліятэцы. Апошнім часам сюды сталі актыўна наведвацца і бацькі. Многія разумеюць, што сыноў і дачок трэба з маленства прывучаць да чытання. А бібліятэкары такой сямейнай цікаўнасці надзвычай радуюцца.
– Прыемна бачыць інтарэс да кнігі, у тым ліку да беларускай, – гаворыць бібліятэкар абанемента Ганна Грышкоўская. – Мы ладзім розныя святы, на якія юныя чытачы прыходзяць з мамамі і татамі. Адзначаем разам і Міжнародны дзень абароны дзяцей, і Дзень сям’і, і Тыдзень дзіцячай і юнацкай кнігі… Пры бібліятэцы працуюць лялечны тэатр “Вясёлка” і аматарскае аб’яднанне экалагічнай накіраванасці “Кропелька”. З маленькіх кропелек ведаў, што даюць мастацкія кнігі, часопісы, энцыклапедыі, утвараецца велізарнае мора ведаў, якое сённяшнім дзецям і падлеткам моцна дапаможа ў дарослым жыцці.
У дзіцячай бібліятэцы з радасцю ўспамінаюць, як удала прайшлі бібліяавацыя “Давайце Маўра пачытаем”, падарожжа ў свет беларускіх кніг “Чытай на роднай мове”, бібліятэчны экалагічны пікнік “Любімы край Беларуссю завецца”, бібліяфестываль “Камянец – горад чытаючы”, віртуальная экскурсія “Беларусь у маім сэрцы”, гадзіна гісторыі “Вежа глядзіць праз стагоддзі”. У чытальнай зале на бачным месцы – выстава “Карагод беларускіх часопісаў”. На канікулах пры дзіцячай бібліятэцы працавала летняя чытальная зала на свежым паветры – у гарадскім скверы, ля знакамітай Камянецкай вежы, на іншых пляцоўках горада бібліятэкары сустракаліся кожны аўторак з юнымі чытачамі. Такім вось чынам бібліятэкары з Камянца спрабуюць прывіць звычку чытаць усюды.
– Можа, таму і сталі нашы дзеці самымі актыўнымі ўдзельнікамі фестывалю кнігі, які бібліятэчныя ўстановы ладзілі ў ліпені да Дня горада, – выказвае меркаванне Ганна Пятроўна і распавядае, як у бібліятэцы рыхтуюца да
1 верасня – дня, калі святы ведаў і беларускага пісьменства сальюцца, каб і дзеці, і дарослыя яшчэ больш пранікліся павагай да матчынага слова і паўней наталілі сваю прагу пазнання.
“Не магу не любіць Беларусь” –
так назвалі бібліятэкары першы ўрок новага навучальнага года для шасцікласнікаў гарадскіх гімназіі і СШ №2. Увогуле, раённая дзіцячая бібліятэка плённа працуе з установамі адукацыі. Сюды, у райцэнтр, прыязджаюць нават з сельскіх школ, каб правесці сумеснае кніжнае мерапрыемства. Даўні сябар – і цэнтр дадатковай адукацыі Камянца, работы яго гурткоўцаў часта выстаўляюцца ў дзіцячай бібліятэцы і  дапаўняюць разнастайныя мерапрыемствы, якія не стамляюцца тут прыдумваць і ладзіць…
Але не толькі дзетак імкнуцца ў Камянцы зацікавіць кнігай. Разнастайныя формы работы з чытачамі мае і “кніжны дом” для дарослых – Камянецкая цэнтральная раённая бібліятэка імя У.М. Ігнатоўскага. Абедзьве ўстановы размешчаны ў адным будынку (дарэчы, побач са славутай вежай).
На гэтым тыдні кіпіць работа: бібліятэкары адбіраюць літаратуру для кніжнай выставы “Мой Камянец – беларуская зямля”. Экспазіцыю павязуць у Быхаў, дзе пакажуць на свяце Дня беларускага пісьменства. Нагадаю, Камянец і сам быў гаспадаром прыстыжнага рэспубліканскага мерапрыемства ў 2005 годзе. Алена Красоўская, загадчык аддзела абслугоўвання, старанна рыхтуецца да гэтай камандзіроўкі. Бібліятэкар расказала:
– Наша выстава падзелена на тры раздзелы: “У даль стагоддзяў зазірні”, “Светачы зямлі Камянецкай” і ”Кніжныя скарбы”. У экспазіцыі ёсць шэраг новых краязнаўчых кніг. У іх ліку – прыгожы фотаальбом “Камянец”, які летась падрыхтавала рэдакцыя раённай газеты “Навіны Камянеччыны”, выданне 2013 года – “Праваслаўныя храмы Камянеччыны” Юрыя Сахарчука. Возьмем кнігі мясцовых аўтараў і ўраджэнцаў раёна – Івана Жытко, Васіля Жуковіча, Ніны Гарагляд і іншых. Хочам паказаць, якія таленавітыя людзі жывуць у нас, якія традыцыі беларускага пісьменства развіваюцца тут…
Вельмі імпануе, што раённая бібліятэка імя У.М. Ігнатоўскага актыўна прапагандуе беларускае слова. Бібліятэкары выходзяць з перасоўнымі выставамі кніг у людныя месцы Камянца: да ўнівермага, Дома быту, на аўтастанцыю. Такія паходы “ў народ” маюць станоўчы эфект: камянчане і вясковыя жыхары, што прыязджаюць у райцэнтр, знаёмяцца з навінкамі літаратуры, атрымліваюць запрашэнні наведаць бібліятэку, удзельнічаюць у конкурсах. Для старшакласнікаў ладзяцца літаратурныя гадзіны “Беларус, сваёй мовы не цурайся!”. Чытачы ахвотна прыходзяць на літаратурныя вечарыны, сустрэчы з пісьменнікамі, прэзентацыі кніг. У кніжным фондзе да 40 працэнтаў выданняў – беларускамоўныя. Бібліятэкары добра ведаюць тых, хто аддае перавагу беларускім кнігам: гэта Ларыса Кавалевіч, Мікалай Шахавец, Вера Філосаф, Наталля Ярашук…
– Мы імкнёмся выхоўваць і падтрымліваць у чытачоў цікавасць да беларускай кнігі, – адзначае намеснік дырэктара бібліятэкі Раіса Паўлючук. – Асабліва звяртаем увагу на моладзь. Вось і ў Дзень ведаў у чытальную залу прыйдуць старшакласнікі гімназіі на першы ўрок новага навучальнага года па тэме “Як ты сэрцу майму мілая, дарагая Беларусь”.
Кніга – сябар чалавека. Даўні і надзейны. У Камянцы прыкладаюць шмат намаганняў, каб сяброўства гэтае доўжылася з пакалення ў пакаленне. І каб у ім абавязкова пачэснае месца займалі выданні на матчынай мове. На беларускай.
Святлана ТАБОЛІЧ, “НТ”,
г. Камянец.

Сёлета дзень ведаў і Дзень беларускага пісьменства адзначаюцца 1 верасня
Оцените статью

Добавить комментарий

Авторизация
*
*
Генерация пароля