Сёння ў Брэсце з удзелам старшыні аблвыканкама Канстанціна Сумара прайшла абласная канферэнцыя педагагічных работнікаў

Адпавядаць часу
Традыцыйная сустрэча педагогаў Брэстчыны перад пачаткам новага навучальнага года прайшла ў абласным цэнтры.Тэма сёлетняга жнівеньскага педсавета – “Рэгіянальная адукацыя: ад ініцыятыў да інавацый і ўкаранення ў практыку” – падкрэсліла гатоўнасць сістэмы адукацыі адпавядаць выклікам часу. Комплексны падыход да навучання, пачынаючы з дашкольнага і заканчваючы атрыманнем прафесіі ў ВНУ, уключэнне ў кола прыярытэтных педагагічных задач праблем спецыяльнай адукацыі, работы пазашкольных устаноў, наватарства і прадпрымальнасць у адукацыйнай галіне, абарона дзяцінства – пра ўсё гэтага гаварылі ўдзельнікі абласной педагагічнай нарады. Бадай што ўпершыню за апошнія гады на вялікім педсавеце так грунтоўна былі паказаны і прааналізаваны ўсе складаючыя часткі адукацыйна-выхаваўчага працэсу.
Перш чым весці дыскусію, удзельнікі мерапрыемства адправіліся на выставу “Адукацыя і творчасць у інтарэсах будучыні”, якая разгарнулася ў абласным грамадска-культурным цэнтры, на плошчы перад ім і ў канферэнц-зале гарвыканкама. Адметнасцю гэтага года можна назваць тое, што дасягненні ў педагагічнай справе паказвалі не толькі педагогі, але і іх вучні. Упершыню дзеці прадэманстравалі, чаму яны вучацца ў садах, школах, прафесіянальна-тэхнічных каледжах і ліцэях, ва ўніверсітэтах Брэстчыны.
Экспазіцыя, разлічаная на дашкольную адукацыю, называлася “Творчасць у імя дзіцяці”. У ёй педагогі паказалі свае распрацоўкі: развіваючыя гульні, экалагічныя праекты, трэнажоры для карэкцыі паставы. “Крокі ў навуку з першага класа” – дэвіз раздзела пачатковай школы. Аказваецца, калі правільна выкарыстаць цікаўнасць малых, дык з іх можна выгадаваць старанных і працавітых вучняў. Аб ахове дзяцінства вялася гаворка на выставачнай пляцоўцы “Сэрца аддаём дзецям” – тут паказалі вопыт работы ў школах-інтэрнатах, карэкцыйна-развіваючых цэнтрах, прыёмных сем’ях. Захапленне выклікала экспазіцыя “Творчасць юных: ад рамяства да прафесіяналізму і мастацтва”, дзе майстар-класы правялі лепшыя педагогі пазашкольных устаноў. Многіх зацікавілі пляцоўкі “Рацыяналізатарства і вынаходніцтва”, “Навуковае праектаванне і ўкараненне”, на якіх гаспадарылі прадстаўнікі сістэмы прафтэхадукацыі і ўніверсітэтаў вобласці. Было відавочна, што адукацыя – гэта не толькі тэорыя, але і практыка, спасціжэннем якой усё актыўней займаюцца навучэнцы каледжаў, ліцэяў, студэнты ВНУ. І гэта правільна, бо асноўная задача адукацыі, як было адзначана на каферэнцыі, – дапамагчы сацыялізацыі маладых людзей, каб кожны з іх змог рэалізаваць свае здольнасці, прынесці карысць краіне, атрымаць асабістае задавальненне, упэўнена адчуваць сябе ў самастойным жыцці. Выхаванне гарманічнай асобы – вось вынік усяго адукацыйнага працэсу, да якога сёння павінна імкнуцца агульнаадукацыйная і вышэйшая школы.
На педсавеце закрануты шэраг актуальных пытанняў. Яго ўдзельнікі гаварылі пра Кодэкс аб адукацыі, які пачынае працаваць з 1 верасня. Многія педагогі менавіта з ім звязваюць спадзяванні на ўпарадкаване работы сістэмы адукацыі ўсіх узроўняў, узмацненне пераемнасці паміж рознымі ступенямі навучання, падняцце прэстыжу педагагічнай працы і навукі. Узнімаліся праблемы прафесійнага майстэрства выхавальнікаў, настаўнікаў, выкладчыкаў. Гучалі разважанні аб тым, якую аддачу прыносяць сродкі, укладзеныя ў развіццё ўстаноў адукацыі ў аграгарадках. Абмяркоўваліся шляхі павышэння якасці адукацыйных паслуг і рэзервы, якія маглі б дапамагчы Брэстчыне паказваць лепшыя вынікі і на прадметных алімпіядах, і на цэнтралізаваным тэсціраванні. Хоць дзеля справядлівасці трэба сказаць, што адораных дзяцей у рэгіёне заўважаюць, іх дасягненнямі ганарацца. Як і педагогамі, якія з гэтымі дзецьмі працуюць.
Новы навучальны год ужо, як кажуць, стаіць на парозе. Апошняй зверкай пазіцый стануць педсаветы ва ўстановах адукацыі Берасцейшчыны, якія пройдуць у бліжэйшыя дні.
Святлана ТАБОЛІЧ, “НТ”.
Фота аўтара.