У Брэсце прайшоў міжнародны юнацкі турнір па хакеі з шайбай

На лёдзе… волаты
На пляцоўцы Лядовага палаца ў абласным цэнтры з 21 па 24 жніўня было горача – на лёдзе тут у традыцыйным хакейным турніры “Волат – 2011” змагаліся 8 каманд змагаліся юнацкія хакейныя каманды з Беларусі, Расіі, Славакіі. Нашу рэспубліку прадстаўлялі хакейныя клубы “Брэст”, “Пружаны” і “Юнацтва” з Мінска.
Гулялі эмацыянальна, аддаючы ўсе сілы барацьбе – так можна ахарактарызаваць настрой турніру. Непасрэднасць юных хакеістаў тым не менш не перашкаджала ім паказваць добры хакей.
Гаспадары турніру ў двух стартавых матчах перамаглі “Амур” з Хабараўска і славакаў з Пухава. Але пераможнага запалу трошкі не хапіла – у выніку брастаўчане ўзялі толькі “бронзу”. “Мы крыху расчараваныя тым, што не змаглі выступіць у галоўным фінале, – сказаў настаўнік брэсцкіх хакеістаў Вадзім Селявонік. – І ўсё ж трэцяе месца – добры вынік. Хацеў бы адзначыць у камандзе Косцю Яромчыка – хлопец, як кажуць, “выстраліў” на гэтым турніры. Сапраўднымі лідарамі былі браты Сушко. Радуе камандны дух, ён і стварае выдатную гульню”.
У фінальным матчы сустрэліся каманды “Юнацтва” і “Паўночная зорка” з Масквы. Лік 7:3  прынёс перамогу масквічам. Іх абаронца Аляксей Герыч стаў лепшым на турніры ў сваім амплуа. Індывідуальныя прызы атрымалі таксама варатар “Ястрабаў” Яўген Вараб’ёў, форвард “Юнацтва” Леанід Іваноўскі і лепшы бамбардзір з каманды “Пухаў” Якуб Лугавы.
Ганна ІВАШЧАНКА,
Дзмітрый ШЫФЕРШТЭЙН,
студэнты БрДУ
імя А.С. Пушкіна.
Фота Юрыя МАКАРЧУКА, “НТ”.