У Брэсце прайшоў XVII абласны конкурс прафесійнага майстэрства аператараў і паштальёнаў

У Брэсце прайшоў XVII абласны конкурс прафесійнага майстэрства  аператараў і паштальёнаў, у якім прынялі ўдзел прадстаўнікі ўсіх раённых вузлоў сувязі – пераможцы першага этапа спаборніцтваў

Каманда 16-га АПС г. Брэста
Два дні таму патэлефанаваў у вёску да маці, расказаў, што пішу пра паштальёнаў. “Вельмі добра, – пахваліла яна, – толькі  не забудзь расказаць пра нашу Вольгу Кулік. Іншая, было, уткне газеціну між штыкецін, з веласіпеда не злазячы. А яна і пра здароўе спытае, і майстра выкліча радыё адрамантаваць, і электрыка…”  Вось такі харошы чалавек прыносіць пошту ў вёску Навасёлкі Драгічынскага раёна…
Лічу, што пра кожнага з чатырох дзясяткаў удзельнікаў чарговага конкурсу прафесійнага майстэрства іх “падшэфныя” вяскоўцы маглі сказаць не менш добрых слоў.
– Вы заслужана прызнаны лепшымі ў сябе дома, – зазначыла, адкрываючы конкурс, Ірына Кандрацюк – намеснік дырэктара Брэсцкага філіяла  РУП  “Белпошта”, старшыня журы. – Гэта выдатна, і я пераканана, што цяпер вы ніколі не зможаце працаваць горш, чым раней. Застаецца толькі адно: павышаць і надалей сваё майстэрства, бо дасканаласць не мае  межаў.
Конкурс прафесійнага майстэрства прайшоў у тры этапы: абарона дамашняга задання, праверка ўзроўню тэарэтычнай падрыхтоўкі і выкананне практычных заданняў. Ён пачаўся з кароткіх “візітовак” каманд. На вялікі жаль, па-беларуску “павіталіся” толькі работнікі сувязі з Івацэвіцкага раёна і Камянеччыны. Пазнаёміўся з першымі: паштальён Тамара Бурдзь і аператар Вікторыя Джэйгала працуюць у Косаве. Тамара Аляксандраўна, паштальён з дваццацігадовым стажам, расказала: “У тым, што дамашняе заданне мы падрыхтавалі на беларускай мове, няма нічога незвычайнага. У нас многа беларускамоўных падпісчыкаў. Карэнныя жыхары, асабліва больш сталага веку, не вельмі намагаюцца гаварыць “па-гарадскому”.  Вось і размаўляем з землякамі на роднай мове”.  Што тут яшчэ можна дадаць?!  Менавіта  такім чынам нараджаецца  людская павага, давер да паштальёна, які ў цяперашняй вёсцы ў вельмі значнай ступені яшчэ і сацыяльны работнік (няхай прабачаць мне прадстаўнікі адпаведных службаў), а іншым разам і адзіны чалавек, які зазірае ў хату да адзінокага нямоглага чалавека, добраахвотна ўзяўшы на сябе абавязкі  своеасаблівага сувязнога з навакольным светам…
Што датычыць пераможцаў, дык у аператараў першае месца заняла Наталля Рудзяк, работнік 16-га аддзялення паштовай  сувязі горада Брэста. На пытанне, што было найбольш цяжкім, дзяўчына, крыху задумаўшыся, адказала: справіцца з хваляваннем. Другое месца ў Наташынай каляжанкі з 5-га аддзялення сувязі Юліі Тукала,  трэцяе – у Ірыны Мрачко (Маларыцкі АПС). Два гады таму ў яе ўжо было трэцяе месца, але… з канца. Вось што значыць праца і настойлівасць!
Найлепшым паштальёнам прызнана Святлана Гаховіч, якая вось ужо 13 год працуе ў 9-м аддзяленні паштовай сувязі ў Баранавічах.  На другім месцы – Наталля Кульчынская, прадстаўніца Кобрынскага  раённага вузла паштовай сувязі (АПС Дывін), на трэцім – Наталля Сукач з Камянеччыны (АПС Абяроўшчына).

Святлана Гаховіч
Пераможцы ў агульным заліку і ў асобных намінацыях  атрымалі граматы і грашовыя ўзнагароды, а ўсе  удзельнікі  –
пазітыўны настрой (у гэтым вялікая заслуга арганізатараў конкурсу)   і дыхтоўныя сучасныя парасоны, якія захінуць ад восеньскай непагадзі і не дадуць забыць пра два жнівеньскія дні ў Брэсце.
Наталля Рудзяк і Святлана Гаховіч будуць абараняць гонар нашай вобласці ў Мінску на заключным этапе канкурсу прафесійнага майстэрства. Наказ адзін – абавязкова вярнуцца з перамогай, бо, калі гэта адбудзецца трэці раз запар, пераходны кубак  РУП “Белпошта” назаўсёды застанецца ў музеі абласнога філіяла.
Мікола СЯНКЕВІЧ, “НТ”.