Беларусь

  • Главная
  • На першым плане
  • З песняй ды жартам крочаць па жыцці ўдзельнікі народнага тэатра гумару, гульні і песні “Хмелеўскія валацугі”

З песняй ды жартам крочаць па жыцці ўдзельнікі народнага тэатра гумару, гульні і песні “Хмелеўскія валацугі”


Цырымонію ўручэння прэмій “За духоўнае адраджэнне” і спецыяльных прэмій дзеячам культуры і мастацтва, якая традыцыйна праходзіць у дні праваслаўных калядных свят з удзелам Прэзідэнта Рэспублікі Беларусь Аляксандра Лукашэнкі і мітрапаліта Мінскага і Слуцкага Філарэта, Патрыяршага Экзарха ўсяе Беларусі, на гэты раз з асаблівым гонарам глядзелі на Жабінкаўшчыне. А як жа не парадавацца за землякоў! Папулярны не тое што ў сваёй вёсцы ды раёне, але далёка за межамі Берасцейшчыны калектыў Хмелеўскага сельскага Дома культуры “Хмелеўскія валацугі” за значны ўклад у адраджэнне і развіццё традыцыйнай рэгіянальнай культуры, народнага гумару, песеннага і танцавальнага мастацтва стаў лаўрэатам спецыяльнай прэміі Прэзідэнта Рэспублікі Беларусь.
Жыццярадасныя і прыгожыя жанчыны аддана служаць народнаму тэатру гумару, гульні і песні “Хмелеўскія валацугі”. Ужо тройчы яны пацвярджалі званне народнага. Летась толькі афіцыйных канцэртаў далі 50, а колькі выступленняў на святах, кірмашах, фестывалях, карпаратывах! І паўсюдна – дасціпны народны гумар, адметная хмелеўская гаворка, жарты, падгледжаныя ў жыцці, шчырае жаданне весяліць і радаваць людзей. Дарэчы, наша газета не раз распавядала пра “Хмелеўскіх валацуг”, бо арыгінальныя праграмы калектыву, творчыя знаходкі яго ўдзельніц, прызнанне гледачоў, перамогі на конкурсах – усё гэта дае інфармацыйную нагоду. Журналісты раз-пораз звяртаюцца да Таццяны Грыцук – дырэктара СДК, яе дачкі Алены Грыцук – медыцынскай сястры ўчастковай амбулаторыі, Валянціны Вайцюк – настаўніцы Хмелеўскай  школы, Людмілы Іванюк – тэхработніка Дома культуры, і Наталлі Дырман – кіраўніка калектыву. А гэтай з’яднанай жаночай камандзе ахвотна дапамагае акампаніятар Аляксандр Казлоў.
На ўрачыстым мерапрыемстве ўручэння прэмій Кіраўнік беларускай дзяржавы адзначыў: “Не хлебам адзіным жыве чалавек. Нават магутныя імперыі старажытнасці разбураліся і гінулі, калі страчвалі сувязную агульнасць ідэалаў, маральных асноў, веры – усяго таго, што ператварае насельніцтва ў народ, а месцажыхарства – у Айчыну”. Аляксандр Лукашэнка падкрэсліў, што народ Беларусі, які перажыў нямала гістарычных драм, ніколі не забываўся на сваю спадчыну, зберагаў паданні, помнікі, традыцыі і песні. І таму не растварыўся ў пясках часу, а застаўся самім сабой, ён пранёс праз стагоддзі гераічны характар і святыя запаветы продкаў.
Як прыемна ўсведамляць, што калектыў з Хмелева мае самае непасрэднае дачыненне да захавання беларускай спадчыны і самабытнай беларускай культуры, таму заслужыў апладысменты ўсёй Беларусі. Таленту апладзіруем стоячы!..
Святлана Таболіч, “НТ”.

Добавить комментарий

Авторизация
*
*
Генерация пароля