СЕЛЬСКІЯ ШКОЛЫ НІ Ў ЧЫМ НЕ ЎСТУПАЮЦЬ ГАРАДСКІМ: журналістка “НТ” наведала Парахонскую сярэднюю школу

Вучыць і выхоўваць
Гэтымі двума напрамкамі вызначаюць, але не абмяжоўваюць дзейнасць сваёй установы настаўнікі і вучні Парахонскай сярэдняй школы
Ідзём з начальнікам аддзела адукацыі Пінскага райвыканкама Валянцінай Бягебай па школьным калідоры. Сучасныя вокны, стыльныя дзверы ў кабінеты, акуратна пафарбаваныя сцены. У некаторыя класы дзверы адчынены, таму відаць новая прыгожая мэбля, кветкі ў вазонах, акуратныя стэнды. Лаўлю сябе на думцы: “Нічога сабе – сельская школка!..” Нібы здагадаўшыся аб не выказаным услых назіранні, дырэктар Парахонскай сярэдняй агульнаадукацыйнай школы Таццяна Мурашкевіч гаворыць: “Дзякуючы таму, што ў Парахонску стварылі аграгарадок, школа нібыта нанова нарадзілася: больш за чатыры мільярды рублёў уклалі ў рамонт, але цяпер і дарослыя, і дзеці дасягнутаму выніку радуюцца”.
Ды якімі б цудоўнымі ні былі сцены, жыццё ў будынку ствараюць не яны, а людзі. Як высветлілася, у парахонскіх школьнікаў жыццё цікавае і актыўнае, і званком з апошняга школьнага ўрока яно не абмяжоўваецца. Так, малодшыя  з задавальненнем наведваюць групу падоўжанага дня. Пакуль бацькі працуюць, малыя паспяваюць падрыхтаваць дамашняе заданне і пагуляць – цацак, розных развіваючых гульняў у школе дастаткова. Аматары народных традыцый спяшаюцца да Валянціны Караткевіч, якая вядзе заняткі ў фальклорным калектыве “Крынічка”. Дзеці развучваюць песні, танцы сваіх бабуль і дзядуль, вывучаюць абрады продкаў. Сваё майстэрства юныя фалькларысты дэманструюць не толькі на мясцовых святах. Да ліку апошніх поспехаў калектыву смела можна аднесці выхад у заключны этап абласнога дзіцяча-маладзёжнага фестывалю “Радавод”. А ў гуртку “Крэатыўнае рукадзелле” пад кіраўніцтвам Валянціны Шпакоўскай школьнікі і модныя строі прыдумваюць ды самі шыюць, і мяккія цацкі вырабляюць, і вышываюць, і з бісеру плятуць – вось такая шматпрофільная творчасць. Ствараць арыгінальныя вырабы сваімі рукамі дапамагае фантазія, якая, як вядома, асабліва багатая ў дзяцей і падлеткаў.
А вось ад удзельнікаў гуртка юных пажарных-выратавальнікаў не фантазія патрабуецца – дакладнасць, засяроджанасць, добрая фізічная падрыхтоўка. Вучні ў гэтым гуртку не толькі засвойваюць правілы бяспекі жыццядзейнасці, рыхтуюцца да спаборніцтваў па пажарна-прыкладным спорце, але і загартоўваюць характар, выхоўваюць сілу волі.
Без гэтых якасцей не абысціся і юным спартсменам. Да іх паслуг – выдатная футбольная пляцоўка са штучным пакрыццём. Больш за 140 чалавек наведваюць секцыі па футболе, валейболе, лёгкай атлетыцы. Чаго варты адзін толькі папулярны “Турнір трох”, які збірае аматараў вясёлых спартыўных эстафет і балельшчыкаў розных узростаў! Традыцыйна ў турніры спаборнічаюць каманды 11 класа, бацькоў і настаўнікаў. “Паверце, там запал спартыўнай барацьбы не саступае алімпійскім хваляванням”, – запэўнівае Таццяна Іванаўна.
Трэба сказаць, што Парахонская школа ўмее сябраваць з рознымі ўстановамі. Напрыклад, з мясцовай школай мастацтваў. Тутэйшыя дзеці выступаюць у духавым аркестры, узорным ансамблі народнай песні і музыкі “Красачкі”, ансамблях скрыпачоў, баяністаў  і акардэаністаў, вакальна-інструментальным ансамблі. Настаўнікі заўважылі, што школьнікі, дакранаючыся да свету цудоўнага, прывучаюцца быць пунктуальнымі, адказнымі, упэўненымі. Дзеці з задавальненнем наведваюць гурткі і школу народнай творчасці ў цэнтры вольнага часу і культуры.
Школу ў яе пачынаннях падтрымліваюць і старшыня Парахонскага сельвыканкама Васіль Кацуба, і дырэктары адкрытых акцыянерных таварыстваў “Парахонскае” Уладзімір Храленка і “Беларускія журавіны” Васіль Лягускі. Сельскія школьнікі адчуваюць сябе ўпэўнена і ў новенькім камп’ютарным класе, і на палетках мясцовай гаспадаркі, і на сцэне, таму што дарослыя ставяцца да іх як да сяброў. А давер старэйшых дарагога каштуе.
Святлана ТАБОЛІЧ, “НТ”,
Пінскі раён.
Фота аўтара.