Беларусь

Ахвяры холаду


У зімовы час пачасціліся выпадкі адмарожванняў і смярцей
Сёлетні зімовы расклад непадобны да многіх папярэдніх гадоў. Тут і снегу гурбы, і мароз кусае нос. На жаль, у пазітыўны настрой сапраўды зімовай пары трывожныя ноткі ўносіць статыстыка медыкаў і выратавальнікаў: у рэгіёне пачасціліся выпадкі траўмаў і смярцей ад холаду. Занепакоенасць сітуацыяй выказалі ўдзельнікі прэс-канферэнцыі, якая прайшла ў чацвер у аддзеле грамадскага здароўя абласнога цэнтра гігіены, эпідэміялогіі і грамадскага здароўя.
Па інфармацыі загадчыка апёкавага аддзялення абласной бальніцы Аляксандра Семенюка, сёлета ў стацыянарах вобласці з-за адмарожванняў лячыліся ці лечацца каля 45 грамадзян. У аблбальніцы зараз знаходзіцца 14 чалавек, якім аказваецца медыцынская дапамога.
“Халадовыя траўмы атрым-ліваюць людзі, якія ігнаруюць умовы надвор’я, недастаткова цёпла апранаюцца, вымушаны доўгі час знаходзіцца на вуліцы, а таксама асобы, у якіх з-за пэўных абставін зніжана здольнасць крытычна ацаніць свой стан. Так, прыкладна 90 працэнтаў адмарожванняў атрыманы ў стадыі алкагольнага ап’янення, – патлумачыў Аляксандр Дзмітрыевіч. – Магчыма, гэта звязана з распаўсюджаным памылковым меркаваннем, што спіртаўтрымліваючыя напіткі саграваюць. Насамрэч, яны прыводзяць да павышанай цеплааддачы і хутчэйшага ахалоджвання, бо стымулююць перыферычны кровазварот, расшырэнне сасудаў і хутчэйшае знясіленне цеплаабароны чалавека”. Часцей ахвярамі холаду становяцца мужчыны і людзі ва ўзросце за 50 год. Зразумела, што ў групе рызыкі знаходзяцца асацыяльныя асобы, а таксама дзеці.
Па словах урача-педыятра абласной дзіцячай бальніцы Таццяны Палійчук, за халодны сезон каля трох працэнтаў пацярпелых складаюць дзеці да 14 год. Гуляць на вуліцы трэба і з малышамі, і са старэйшымі дзецьмі, але неабходна памятаць пра час знаходжання на свежым паветры, адпаведнасць вопраткі і абутку сезону. Перад прагулкай дзіця лепш пакарміць, а на вуліцы сачыць, каб яно дыхала носам. “Нашы метэаўмовы такія, што адмарожванне можна атрымаць і пры 0 градусаў, – сказала Таццяна Іванаўна. – Дзеці схільныя да пераахалоджвання і замярзання часцей, чым дарослыя, бо цеплааддача ў іх вышэйшая. Лепш гуляць некалькі разоў карацейшых у часе, чым адзін раз і вельмі доўга”.
Медыкі нагадваюць: калі ў вас з’явіліся прыкметы адмарожвання (бледны колер скуры, страта адчувальнасці), вы знаходзіліся на вуліцы больш за паўгадзіны-гадзіну, неадкладна звяртайцеся за дапамогай. Важна зрабіць гэта своечасова. Калі атрымана глыбокая ступень адмарожвання, дык пасля сагравання пацярпелага ўчастка ў ім аднаўляецца кровазварот, але сасуды трамбіраваны, тканкі не атрымліваюць дастаткова кіслароду, яны гінуць, што і прыводзіць да ампутацыі.
“Нельга адаграваць цела ў гарачай вадзе. Першая дапамога – гэта гарачы чай, кава і цеплаізалюючая павязка – на пацярпелы ўчастак накладаем бінт ці марлю, затым вату, поліэтылен і замацоўваем павязку. Адпраўляемся ў бальніцу ці выклікаем “Хуткую дапамогу”, – раіць Аляксандр Семянюк. – Расціраць цела не трэба, асабліва снегам, бо гэта прыводзіць да дадатковага ахалоджвання і траўматызацыі скуры”.
Сіноптыкі прагназуюць далейшае паніжэнне тэмпературы. Улічыце гэты фактар, выходзячы на вуліцу.
Святлана ТАБОЛІЧ, “НТ”.

Ахвяры холаду
Оцените статью

Добавить комментарий

Авторизация
*
*
Генерация пароля