Зялёныя фуражкі і берэты, зялёныя пагоны… Нават дзетсадаўцы ў горадзе над Бугам па гэтых дэталях ваеннай формы лёгка “вылічаць” сярод вайскоўцаў пагранічнікаў. А як жа іначай – вартавыя мяжы і Брэст амаль што тоесныя паняцці. Горад не проста знаходзіцца на граніцы, ён жыве на ёй: дзясяткі кіламетраў заходняй мяжы Беларусі адначасова з’яўляюцца і мяжой Брэста, 6 пунктаў пагранічнага пропуску, 3 лінейныя заставы знаходзяцца на гарадской тэрыторыі. Дзясяткі год гэтаму адзінству, якое замацавана гераізмам і адвагаю вартавых граніцы. Таму няма нічога дзіўнага, што Дзень пагранічніка любяць у Брэсце і ахвотна святкуюць разам з ваеннымі. А сёлета тым больш урачыста, бо пагранічнай службе нашай краіны – 95 год.
Юбілейнай даце было прысвечана святочнае мерапрыемства, якое напярэдадні Дня пагранічніка прайшло ў абласным грамадска-культурным цэнтры з удзелам кіраўніцтва вобласці і горада. На сустрэчу прыйшлі лепшыя байцы пагрангрупы, ветэраны пагранічных войскаў, моладзь.
Камандзір Брэсцкай Чырвонасцяжнай пагранічнай групы імя Ф. Э. Дзяржынскага палкоўнік Андрэй Кукара выказаў упэўненасць: “Пагранічныя войскі выконвалі, выконваюць і будуць выконваць тую задачу, якую паставіў перад імі Кіраўнік дзяржавы. Мы – вартавыя мяжы і гэтым усё сказана”. А старшыня аблвыканкама Канстанцін Сумар заўважыў, што юбілей пагранічнікаў для берасцейцаў больш, чым дата ў календары. “У нас вельмі добрыя адносіны да людзей, якія абараняюць нашу граніцу ад самых розных праблем, – зазначыў кіраўнік вобласці. – Няма нічога больш важнага, чым абарона рубяжоў сваёй Радзімы, а пагранічнікі сваім гераізмам неаднаразова пацвярджалі вернасць доўгу і прысязе…”
Сёлета байцамі пагранатрада за чатыры месяцы затрымана амаль 700 парушальнікаў дзяржаўнай мяжы Рэспублікі Беларусь, спынены спробы незаконнай перавозкі матэрыяльных каштоўнасцей больш чым на 9 мільярдаў рублёў. Мільёны адзінак транспарту і дзясяткі тысяч людзей перасяклі з пачатку года беларускую граніцу – без працы нашы пагранічнікі не сядзяць. І справядліва заўважыў старшыня абласнога Савета дэпутатаў Сяргей Ашмянцаў: “У Брэстчыны ёсць усе падставы ганарыцца пагранічнікамі”.
Кіраўніцтва вобласці, горада адзначыла лепшых вайскоўцаў ганаровымі граматамі, а артысты, у іх ліку быў і ўзорна-паказальны аркестр Брэсцкай пагрангрупы, парадавалі пагранічнікаў песнямі і танцамі.
У Брэсце на гэтым тыдні таксама прайшлі ўрачыстасці ля мемарыяла “Вартавым мяжы” (на здымку) і ў крэпасці, дзе вайскоўцы ўшанавалі памяць загінулых у гады Вялікай Айчыннай вайны пагранічнікаў.
Святлана ТАБОЛІЧ, “НТ”.
Брэсцкая Чырванасцяжная пагранічная група імя Ф.Э. Дзяржынскага адсвяткавала 95-годдзе пагранічных войскаў
