Буйнейшая ў краіне гандлёвая сетка “Еўраопт” прырасла ў Брэсце яшчэ адным супермаркетам

Першы горад, які “акупавала” гэта гандлёвая сетка на Брэстчыне, быў, як ні дзіўна, не абласны цэнтр, а Пінск. Менавіта ў горадзе над Пінай 26 мая 2011 года расчыніў дзверы перад пакупнікамі гіпермаркет “Еўраопт”. Праз паўгода, 22 снежня, такі ж буйны магазін з’явіўся і ў Брэсце.
А сёння мы ўжо і ўявіць сабе не можам, што зусім нядаўна неяк абыходзіліся без “еўраоптаўскіх” крам. Тут і цэны самыя аптымальныя, і абслугоўванне ветлівае, і выбар тавараў проста небывалы.
18 чэрвеня 2014 года ў Брэсце адкрыўся яшчэ адзін “еўраоптаўскі” супермаркет – у мікрараёне Бярозаўка, самым абдзеленым у горадзе з пункту гледжання гандлёвага абслугоўвання. Цяпер, як адзначыў на ўрачыстай цырымоніі адкрыцця магазіна старшыня гарвыканкама Аляксандр Палышанкоў, гэты недахоп выпраўлены.
Будуць тут абслугоўваць не толькі жыхароў мікрараёна Бярозаўка, але і многіх іншых лю-дзей, якія едуць у напрамку на Камянец. Месцазнаходжанне ў магазіна вельмі зручнае – на перакрыжаванні дарог.
– Магазін проста выдатны, – гаворыць яго дырэктар Андрэй Перчанка. – Створаны ўсе ўмовы як для пакупнікоў, так і для абслуговага персаналу. Пад адным дахам – 3000 квадратных метраў гандлёвых плошчаў і 265 работнікаў. Так што гарантуем якасную работу.
Віктар ВІКТАРАЎ, “НТ”.