“Палессежылбуд” пачынае забудову трэцяга раёна на тэрыторыі былога Паўночнага ваеннага гарадка

Адкрытае акцыянернае таварыства “Палессежылбуд” пачынае забудову трэцяга раёна на тэрыторыі былога Паўночнага ваеннага гарадка ў Брэсце
Асваенне тэрыторыі былога ваеннага гарадка пачалося ў 2007 годзе і было выклікана дэфіцытам новых будаўнічых пляцовак у горадзе і высокай запатрабаванасцю жылля. Адначасова вырашалася яшчэ адна задача – прывядзенне ў парадак гэтай дастаткова вялікай тэрыторыі, аптымізацыя дарожна-транспартнай і інжынернай інфраструктуры. Паўночны гарадок быў разбіты на тры раёны перспектыўнай забудовы. На цяперашні час уве-дзены ў эксплуатацыю групы жылых дамоў “Поўнач-1” і “Поўнач-3”. Пачата асваенне апошняга, трэцяга, раёна – “Поўнач-2”. Усё праектаванне і будаўніцтва вядзецца сіламі адкрытага акцыянернага таварыства “Палессежылбуд” – аднаго з найбольш аўтарытэтных у краіне прадпрыемстваў з амаль што 40-гадовым вопытам працы ў будаўнічай галіне.
У Паўночным раёне ўзведзена і будуецца жыллё розных форм уласнасці. Гэта не толькі дамы дольнага будаўніцтва, але і кааператыўнае, ведамаснае і сацыяльнае жыллё.
Цяпер, калі большая частка тэрыторыі ўжо асвоена, можна сказаць дакладна, што праект атрымаўся зручным для навасёлаў. Удала распрацавана транспартная сетка: вуліца-дублёр Рэспубліканскай дапамагла знізіць транспартную нагрузку ў раёне, і цяпер павелічэнне парку асабістых аўтамабіляў не будзе мець негатыўных наступстваў. Дэфіцыту аўтамабільных парковак таксама не адчуваецца. Двары спраектаваны такім чынам, што ў іх, акрамя месцаў для асабістых аўто, зручна размешчаны дзіцячыя і спартыўныя пляцоўкі, зоны адпачынку, малыя архітэктурныя формы. Новыя пяці- і дзевяціпавярховыя дамы  арганічна ўпісаліся ў гістарычную забудову. Звонку іх упрыгожыла жоўтая і чырванавата-карычневага (тэракотавага) колеру керамічная цэгла вытворчасці ААТ “Керамін”, якасная, надзейная. Гэта дазволіць дамам у Паўночным раёне на працягу доўгага часу не згубіць сваю эстэтычную прываблівасць.  Такі рэтра-дызайн невыпадковы: раён суседнічае з адно- і двухпавярховымі, пабудаванымі з чырвонай цэглы будынкамі казарм XIX стагоддзя, якія ахоўваюцца дзяржавай як помнікі архітэктуры. Многія з іх беражліва рэканструяваны і эксплуатуюцца як рознага кшталту аб’екты кіравання і гаспадарання.
Ды старыя і новыя пабудовы пераклікаюцца не толькі колерам, але і пластыкай фасадаў. Пяціпавярховыя дамы, як і архітэктурныя помнікі, маюць скатныя дахі з металачарапіцы чырвонага колеру. Яшчэ адно цікавае дызайнерскае рашэнне – лоджыі з дэкаратыўнай агароджай. Задумка ў тым, што непразрыстая частка агароджы невысокая, а яе працяг пераходзіць у мудрагелісты металічны арнамент. Атрымалася прыгожа, светла і бяспечна.  Акрамя таго, сцены, вокны і дах забяспечваюць усе сучасныя патрабаванні па захаванні ў памяшканні цяпла ў халодную пару года. Зручная планіроўка кватэр, прадуманыя сучасныя інжынерныя рашэнні (у тым ліку магчымасць індывідуальнага рэгулявання расходу цяпла) робяць жыццё ў дамах раёна камфортным.
Трохі падрабязней пра кожны з раёнаў. “Поўнач-1” знаходзіцца ў раёне вуліцы Рэспубліканскай. На плошчы ў  3,5 гектара тут размясціліся два пяціпавярховыя шасці- і дзевяцісекцыйныя дамы і адзін дзевяціпавярховы прыгажун на чатыры пад’езды. На цокальных паверхах – магазіны і іншыя аб’екты сацыяльна-культурнага прызначэння. Жыхары 410 кватэр (а гэта больш за тысячу чалавек) ужо некалькі гадоў назад справілі тут наваселле. Да паслуг аўтаўладальнікаў 143 месцы на аўтамабільных стаянках у межах участка.
“Поўнач-3” знаходзіцца на паўночным захадзе ад першага раёна і займае плошчу большую  прыкладна ўдвая, на трэць больш тут і кватэр – 643. Работы па праектаванні і асваенні абодвух аб’ектаў вяліся фактычна паралельна. Знешні архітэктурны выгляд дамоў (іх, пяці- і дзевяціпавярховых, усяго 7) таксама вельмі падобны. Такім чынам, “Поўнач-1” і “Поўнач-3” можна лічыць  раёнамі-блізнятамі на карце сучаснага Брэста.
Упраўленнем праектных работ ААТ “Палессежылбуд” распрацаваны праект і апошняга, трэцяга, раёна, абмежаванага вуліцамі Чырвона-гвардзейскай (дарэчы, гэтая галоўная транспартная артэрыя Паўночнага раёна ў перспектыве будзе пашырана да 4 палос) і Шчорса. Будаўнічая пляцоўка падрыхтавана ўжо.
Якім жа пабачаць “Поўнач-2” брастаўчане і госці горада ў недалёкім будучым? Па знешнім выглядзе ён у нечым пераклікаецца са сваімі раёнамі-братамі, але ў той жа час мае свой непаўторны твар. Тут будзе  больш атынкаваных і пафарбаваных у зялёны і шэры колер паверхняў. Гэта стала магчымым па той прычыне, што “Поўнач-2” некалькі аддалены ад гістарычнай забудовы. Дамы маюць зашклёныя з верху да нізу лоджыі, сучасныя вітражы. Пры забудове плануецца выкарыстоўваць фасадную сілікатную цэглу акцыянернага таварыства “КварцМелПрам”, якое знаходзіцца ў Маларыцкім раёне. Тым самым зніжаецца кошт аб’екта і  падтрымліваецца мясцовая прамысловасць. “Поўнач-2” больш вышынны, чым яго старэйшыя браты – тры з пяці жылых дамоў “дарастуць” да 10 паверхаў. Справа ў тым, што сучасныя будаўнічыя нарматывы дазваляюць павялічваць на 1 паверх вышыню дамоў без змяненняў істотных патрабаванняў да іх “камплектацыі”, і гэтым нельга было не скарыстацца. Рынак патрабуе быць эканомным.
У апошнім з трох раёнаў будуць пабудаваны 634 кватэры (у асноўным двухпакаёвыя). З паўднёвага боку дамоў размесцяцца дзіцячыя гульнявыя пляцоўкі (асобныя для дашкольнага і школьнага ўзростаў). Жыхары  запраектаваных дамоў не адчуюць праблем з дзіцячымі садкамі – дашкольныя ўстановы на вуліцах Чырвонагвардзейская і Рэспубліканская ў нарматыўнай пешаходнай даступнасці (гэта 500 метраў). Багатая сваімі традыцыямі сярэдняя школа №17 таксама недалёка.
Можна з упэўненасцю сказаць, што “Поўнач-2”, як і суседнія раёны, будзе пабудаваны ў самыя сціслыя тэрміны. Яго забудоўшчык, акцыянернае таварыства “Палессежылбуд”, галоўная формула поспеху якога – спалучэнне высокіх тэмпаў і якасці будаўніцтва пры ўмераных цэнах, – мае высокакваліфікаваных рабочых і спецыялістаў, валодае магутнай вытворчай базай, выкарыстоўвае  перадавыя тэхналогіі і сучасныя матэрыялы.
Пройдзе не так многа часу, і Брэст прырасце яшчэ адным раёнам амаль што ў цэнтры горада. З пляцоўкі адбудаванага чыгуначнага вакзала добра відаць чырвоныя чарапічныя скаты новых дамоў Паўночнага.
Мікола СЯНКЕВІЧ, “НТ”.