Руку сяброўства прыродзе падалі юныя эколагі з Лактышоў.
Вёска Лактышы добра вядомая за межамі Ганцавіцкага раёна, дзякуючы аматарам рыбнай лоўлі. Паблізу яе працякае рака Лань, побач жа раскінулася буйное рукатворнае вадасховішча і рыбгас “Лактышы”. Тых, хто любіць частавацца яршовай юшкай ці запечаным у смятане карасём, вабяць гэтыя маляўнічыя мясціны. Нездарма ж у мінулым годзе тут былі праведзены рэспубліканскія спаборніцтвы па рыбнай лоўлі, у якіх прынялі ўдзел прыхільнікі гэтага віду спорту з усіх куткоў Беларусі. Але, на жаль, сюды прыязджаюць не толькі добрасумленныя рыбакі і аматары бавіць свой вольны час на прыродзе. Ёсць і такія, хто спрабуе палавіць рыбку недазволенымі браканьерскімі сродкамі. Дазваляюць сабе ссекчы маладое дрэўца на беразе вадаёма, памыць у чыстай вадзе брудны аўтамабіль, пакінуць пасля начлегу смецце, часам здараецца, што нават не патушаць касцёр. Такія паводзіны наносяць шкоду навакольнаму асяроддзю. Менавіта зыходзячы з гэтага, пры Лактышоўскім сельскім клубе было створана дзіцячае аматарскае аб’яднанне “Аквафіл” прыродазнаўчага кірунку. Галоўнай мэтай суполкі стала экалагічнае выхаванне насельніцтва. На рахунку “Аквафіла” шэраг праведзеных для насельніцтва тэматычных вечароў, віктарын, інфармацыйна-пазнавальных праграм на экалагічную тэматыку. Цеснае супрацоўніцтва наладжана з міжраённай інспекцыяй па ахове жывёльнага і расліннага свету. Разам з супрацоўнікамі гэтага ведамства юныя эколагі праводзяць акцыі “Чысты вадаём”, “Экалагічная сцяжынка”, “Чысты бераг”, “Руку сяброўства – прыродзе” і іншыя. На базе аб’яднання створаны пры сельскім клубе музей рыбалоўства, у якім размешчаны не толькі сучасныя прыстасаванні рыбнай лоўлі, але і такія, якімі карысталіся яшчэ нашы продкі. Наведвальнікі гэтага музея могуць даведацца, якімі прыладамі можна карыстацца, а якімі – забаронена. Удзельнікі “Аквафіла” нават праводзяць зімой спаборніцтвы па рыбнай лоўлі. Рыбакі паказваюць свае здольнасці, аб чым сведчаць рыбацкія трафеі ў выглядзе плотак, акунёў, яршоў. Галоўным жа прызам для ўсіх становіцца бадзёры настрой, які дорыць нам прырода. Каб ён быў заўжды, неабходна працягнуць ёй руку сяброўства, паважаць і берагчы яе. А гэта ўласным прыкладам дэманструюць лактышоўскія эколагі.
Мікалай ЛЕНКАВЕЦ
Сцяжынкі “аквафіла”
