У музеі “Выратаваныя мастацкія каштоўнасці” дзейнічае выстава “Восень-2013. Каляровы калейдаскоп”

Музей “Выратаваныя мастацкія каштоўнасці” зноў размясціў у сваіх сценах выставу творчых работ выкладчыкаў дзіцячай школы выяўленчых мастацтваў г. Брэста. Экспазіцыя 12-я па ліку, і ў гэты раз ёй дасталася назва адпаведна сезону – “Восень-2013. Каляровы калейдаскоп”.
У багатым калейдаскопе работ, прадстаўленых на экспазіцыі творчага актыву школы, сапраўды, адчувалася непадробная шчырасць да любімай справы. А яшчэ – неверагодная смеласць, бо, як вядома, не ўсе педагогі адважваюцца агаліць кавалачак уласнага свету перад самымі суровымі крытыкамі –
сваімі маленькімі навучэнцамі. А іх падчас урачыстага адкрыцця было шмат.
– Выстава з’яўляецца справа-здачнай, – адзначыла Святлана Вяль, дырэктар дзіцячай школы выяўленчых мастацтваў. – Аўтары ішлі да яе на працягу цэлага года, а таму для нас гэта сапраўднае свята. Дзеткі, якія любяць маляваць, маюць цудоўную магчымасць паглядзець, што сабой уяўляе той ці іншы выкладчык і чаго ад яго чакаць.
Свае работы на суд прысутных выставілі 15 настаўнікаў школы. Жанравая разнастайнасць твораў вельмі багатая – жывапіс, габелен, бацік, графіка. Не памылюся, калі агучу думку, якая, здаецца, лунала ў паветры: асенні калейдаскоп у версіі школы мастацтваў, і сапраўды, насычаны яркімі фарбамі…
Ніна ЛЕАНАВЕЦ, “НТ”.