Беларусь

Выбраны лепшыя спецыялісты булачнай вытворчасці


15 хлебапёкаў прынялі ўдзел у абласной школе перадавога вопыту і конкурсе прафесійнага майстэрства сярод спецыялістаў булачнай вытворчасці прадпрыемстваў РУВП “Брэстхлебпрам”.
Рыхтуючыся да надыходзячага Вялікадня, пекары, кандытары, глазуроўшчыкі, майстры прадэманстравалі новыя распрацоўкі смачнай прадукцыі ў Брэсце. Паспрачацца за званне лепшых і абмяняцца вопытам з калегамі ў абласны цэнтр прыехалі 15 хлебапёкаў з 8 прадпрыемстваў РУВП “Брэстхлебпрам”. Пераможцы заводскіх конкурсаў цудоўна падрыхтаваліся да фіналу. Быццам мастакі на пленэры, жанчыны чаравалі над сваімі шэдэўрамі. А інакш вырабы з цеста, упрыгожаныя складанымі ўзорамі і рознакаляровымі фарбамі глазуры, не назавеш.
– Абласная школа прафмайстэрства – рэпетыцыя перад традыцыйным рэспубліканскім конкурсам, – расказаў генеральны дырэктар РУВП “Брэстхлебпрам” Леанід Брыч. – Асноўная задача такіх мерапрыемстваў – даць магчымасць хлебапёкам расказаць пра свае навінкі і пазнаёміцца з працай калег. Набліжаецца любімае беларусамі свята – Вялікдзень, і ўжо цяпер хлебазаводы пачалі актыўную падрыхтоўку. На магазінных паліцах хутка з’явяцца новыя віды прадукцыі, але, вядома ж, ідэй мала не бывае. Для таго, каб абнавіць і дапоўніць асартымент, і праводзім такое мерапрыемства.
Карпатліва і з душой удзельніцы конкурсу стваралі дзіўнай прыгажосці прысмакі. Усе яны былі прысвечаны тэме Вялікадня і любові да роднага краю. Царква, беларускі герб, бусел і зубр – фантазія хлебных майстроў не ведала межаў. Не адну гадзіну жанчыны правялі ў цэху, даводзячы да ладу дамашнія загатоўкі. Канкурсанткі вельмі хваляваліся, у некага не атрымалася ажыццявіць задуманае, але ўсе работы прыемна парадавалі вока і падражнілі смакавыя рэцэптары прысутных. Строгае журы прыдзірліва ацэньвала рэцэптуру, знешні выгляд, ажыццяўленне ідэі конкурсу і нават арыгінальнасць упакоўкі.
Асаблівую ўвагу выклікалі назвы ласункаў. Какетліва прэзентавалі булачкі “Ладушка” і “Шакаладушка”. Нікога не пакінуў абыякавым спакуслівы водар кекса “Красавічок”. А пірагі “Фрукцішка” і “Велікодны” бралі ў палон прыгожым афармленнем. Зыходзячы з тэматычнай накіраванасці конкурсу, члены журы шмат увагі ўдзялялі кулічам. Сёлета хлебапёкі зрабілі акцэнт на смак, а не на афармленне. Сапраўды, водар, які панаваў у зале, быццам вяртаў у дзяцінства, калі мама пякла дамашнія святочныя кулічы.
Сярод конкурсных работ адразу ж выдзялілася баранавіцкая “Царква”.   І атрымалася гэта настолькі неардынарна, што журы аднагалосна прысудзіла ёй Гран-пры конкурсу. Першае месца заняла Святлана Саковіч з Брэста. Другое і трэцяе – Таццяна Калюта з Баранавіч і Іна Качалоўская з Брэста.
Пераможцы атрымалі дыпломы і грашовыя прэміі, а ўсе ўдзельнікі – лісты падзякі і задавальненне ад таго, што іх кулінарныя работы дораць людзям радасць не толькі смакавымі якасцямі, але і знешнім выглядам. Прысутныя ж, у ліку якіх была і аўтар публікацыі, змаглі першымі паспрабаваць ласункі, якія толькі чакаюць магчымасці трапіць у продаж. Забыўшы пра дыеты і абмежаванні, з задавальненнем паспрабавала здобныя вырабы. Смачна! Кандытар Вераніка Абдулаева стварыла салодкую копію храма.
Вольга СВІРЫДОВІЧ, “НТ”,
Фота аўтара.

Выбраны лепшыя спецыялісты булачнай вытворчасці
Оцените статью

Добавить комментарий

Авторизация
*
*
Генерация пароля