За тыдзень у вобласці зарэгістравана 5 няшчасных выпадкаў гібелі людзей на вадзе

Спякота. Людзі шукаюць паратунку ад гарачыні каля вады. На жаль, далёка не заўсёды паход на рэчку заканчваецца добра.
На мінулым тыдні ў Столінскім раёне не вярнуўся з рыбалкі на возеры Гусліва каля вёскі Хорск 52-гадовы працаўнік СВК “Прыгарынскі”, а ў Камянецкім пасля падзення патануў у Лясной паблізу вёскі Чарнакі 63-гадовы мясцовы жыхар. На сажалцы на вул. Лісовіча ў Лунінцы трагічна загінуў 63-гадовы пенсіянер. На Століншчыне 14 чэрвеня ў небяспечным для купання возеры паблізу вёскі Варані, дзе ёсць вялікія перапады глыбіні, загінуў 12-гадовы падлетак. У Пінскім раёне ў непрыдатным для купання месцы на рацэ Піна загінуў 54-гадовы жыхар Пінска, які знаходзіўся ў стане алкагольнага ап’янення.
У зонах дзеяння выратавальных станцый і пастоў абласнога савета Таварыства выратавання на вадзе за мінулы тыдзень выратавана 5 чалавек, з іх двое – непаўнагадовых.
Вада забірае і дарослых, і дзяцей. Абласны савет ТВВАД нагадвае: захоўвайце асцярожнасць каля вады! Памятайце, што нават невялікая колькасць спіртнога можа прывесці да бяды! Беражыце жыццё дзяцей!
Рамуальд САДОЎСКІ,
старшыня абласнога савета ТВВАД.