Навічкам давяраюць

Брэсцкае РУП “Фармацыя” сёлета прыняло 30 маладых спецыялістаў
Што і казаць, да маладых спецыялістаў найчасцей ставяцца насцярожана. Маўляў, сядзець у аўдыторыі і слухаць лекцыі – гэта адно, а практычная работа – справа зусім іншая. Але ёсць арганізацыі, дзе навічкам давяраюць, узяўшы на працу – падтрымліваюць, каб яны паверылі ў сябе.
У гэтым годзе Брэсцкае РУП “Фармацыя” прыняло на працу 30 маладых спецыялістаў, з іх – 14 правізараў, якія скончылі Віцебскі дзяржаўны медыцынскі ўніверсітэт, а 16 фармацэўтаў навучаліся ў Магілёўскім медыцынскім каледжы. Усе яны на сённяшні дзень працуюць у аптэках вобласці.
У Маларыцкі раён прыйшлі адразу пяць маладых спецыялістаў. Юлія Дораш, Кацярына Юкімовіч, Вераніка Стрыбулевіч і маладая сямейная пара Уладзімір і Марына Чукавы паспелі ўжо асвоіцца на новым месцы. Першыя крокі часам даюцца нялёгка, але ў Маларыцкай цэнтральнай раённай аптэцы № 14 паклапаціліся, каб маладыя кадры адчувалі сябе камфортна.
Загадчыца ЦРА Наталля Ганчарэнка расказала:
– Маладым спецыялістам мы заўсёды рады, таму што маладыя – гэта наша будучыня, наша заўтра. Усім ім па прыбыцці далі інтэрнат, выплацілі матэрыяльную дапамогу. Мы любім працаваць з маладымі, бо з імі вельмі цікава, ад іх нібы набіраешся новых сіл, пазітыўных эмоцый. Калегі адзначаюць, што папаўненне добра і сур’ёзна падрыхтаванае. Новыя кадры могуць упэўнена працаваць і даваць карысныя парады лю-дзям, якія да іх звяртаюцца.
А як ацэньвае свае першыя крокі моладзь? Марына Чукава ахвотна падзялілася ўражаннямі ад першага месца працы:
– Я сама тутэйшая, і калі прапанавалі пасля ўніверсітэта работу ў Маларыце, згадзілася. Многім хочацца быць бліжэй да родных мясцін, але не ўсім такі шанс на размеркаванні выпадае. Муж таксама са мной пагадзіўся – і вось працуем разам. Шчыра кажучы, не думалі, што нас так зычліва прымуць. Працаваць падабаецца. Як і ў кожнай прафесіі, у фармацэўтаў ёсць свае цяжкасці, але калі ты любіш сваю справу, дык яны зусім не палохаюць. У нас добры калектыў, прыемныя наведвальнікі і не так даўно быў зроблены рамонт. Чаму ж не працаваць?!
Пагутарыўшы з наведвальнікамі цэнтральнай раённай аптэкі, упэўнілася: людзям падабаецца, што абслугоўваюць іх маладыя спецыялісты, кваліфікацыі якіх яны давяраюць.
Згадзіцеся, спецыялістам, якія пачынаюць сваю працоўную дзейнасць, патрэбна падтрымка, каб не губляць сілу духу і веру ў сябе. А гэта – самае галоўнае для паспяховай працы.
Анастасія МАКСІМУК,
студэнтка Інстытута журналістыкі БДУ,
г. Маларыта.
Фота аўтара.