Аперацыя «БОМЖ»

У ЧАЦВЁРТЫ РАЗ МАШТАБНУЮ АКЦЫЮ ПА ВЫДАЛЕННІ
З ГРАМАДСКІХ МЕСЦАЎ, ГАРАДСКІХ ЗВАЛАК І ПРЫТОНАЎ АСОБ
БЕЗ ПЭЎНАГА МЕСЦА ЖЫХАРСТВА ПРАВЯЛІ Ў ГОРАДЗЕ БРЭСЦЕ
СУПРАЦОЎНІКІ ЎПРАЎЛЕННЯ ЎНУТРАНЫХ СПРАЎ АБЛВЫКАНКАМА.
Па хадайніцтве міліцыі работнікі ДУ «Брэсцкі занальны цэнтр гігіены і эпідэміялогіі» зрабілі санітарную апрацоўку бамжоў. Медыкі праверылі іх на наяўнасць венерычных хвароб і туберкулёзу, прадстаўнікі Чырвонага Крыжа аказалі гуманітарную дапамогу  –  выдалі кожнаму прадметы гігіены і прадукты харчавання, а свяшчэннаслужыцелі паклапаціліся аб маральнай падтрымцы.
Як паведаміў кіраўнік прэс-цэнтра ўпраўлення ўнутраных спраў аблвыканкама Віктар Васілеўскі, асноўная задача міліцыі  ў праведзенай акцыі – паставіць гэты спецыфічны кантынгент на фота- і відэаўлік, узяць адпячаткі пальцаў і біялагічны матэрыял для геннай экспертызы. Не сакрэт, што нярэдка вясной супрацоўнікі праваахоўных органаў у самых розных месцах знаходзяць «падснежнікі» –
неапазнаныя трупы людзей, якія вядуць такі «качавы» лад жыцця. Часта высветліць іх асобы вельмі складана.
У час акцыі прайшла і праверка бамжоў на ўдзел у магчымых злачынствах. Міліцыянеры спрабавалі высветліць прычыны вядзення асацыяльнага ладу жыцця, дапамагчы аднавіць згубленыя дакументы.
Журналісты ж мелі магчымасць пагутарыць з бяздомнымі і выслухаць некалькі гісторый.
Аляксандр, 52 гады:
– Звычайная біяграфія. Закончыў сярэднюю школу, адслужыў у арміі, атрымаў рабочую спецыяльнасць. Працаваў кранаўшчыком на адным з брэсцкіх заводаў. Потым стварыў сям’ю, з жонкай нарадзілі дваіх дзетак. Адным словам, усё, як у людзей.
У ліхія 90-я не стала работы, стабільнага заробку. Давялося падацца ў «чаўнакі», ездзіць за таварам у Кітай, Турцыю. З’явіліся «шалёныя» грошы, можна было пагуляць. Потым  гандлёвы бізнес прыйшоў у заняпад і перастаў прыносіць даход. Шэсць гадоў таму за п’янства жонка выставіла з дому, сын і дачка ведаць мяне не жадаюць. Вось з таго часу і бамжую. Недзе згубіў пашпарт, таму і на работу ўладкавацца не магу.
Дзякуй міліцыі за падобныя мерапрыемствы. Летась у мяне выявілі такім чынам туберкулёз. Своечасова трапіў у бальніцу – вылечыўся.
Уладзімір, 64 гады:
– Пакуль сядзеў у турме, родзічы выпісалі з бацькоўскай кватэры і прадалі яе. У мяне 32 гады працоўнага стажу, пашпарт ёсць. Рэгулярна атрымліваю на пошце пенсію, апошні раз 508 тысяч рублёў была. Мне яе хапае на некалькі дзён пагуляць з калявакзальнай публікай. Таму грошы стараюся аддаваць свайму сябру, які не п’е, а потым бяру ў яго па 20 тысяч у дзень. Інакш усё сабутэльнікі выманяць. Добра было б на зіму кватэру зняць, але і так на вуліцы не застануся: ведаю, дзе на вакзале можна ноч «перакантавацца».
Аб выніках работы з асобамі без пэўнага месца жыхарства ў 2010 годзе расказаў старшы інспектар упраўлення аховы правапарадку і прафілактыкі УУС аблвыканкама маёр міліцыі Уладзімір Шкуцько:
–Усяго дастаўлена з месцаў агульнага карыстання, а таксама тэрыторый гарадскіх звалак 354 бамжы. Асобы 326 з іх былі ўстаноўлены. Дарэчы, трое лічыліся без вестак зніклымі. Выяўлены шэсць неплацельшчыкаў аліментаў. На лячэнне ў скура-венералагічны і туберкулёзны дыспансеры накіраваны адпаведна 32 і 48 чалавек. Раскрыты тры злачынствы, учыненыя бамжамі, а таксама выяўлены 17 малалетніх бадзяг і папрашаек. Падрыхтаваны матэрыялы на дэпартацыю за межы Беларусі пяці чалавек.
Юрый МАКАРЧУК, «НТ».
Фота аўтара.